Serverte mat utan løyve – no er han dømd
Innehavaren av Pizzeria Milano i Strandebarm braut lova då han serverte mat i restauranten i fjor vinter.
Det konkluderte Hordaland tingrett med etter ei rettssak nyleg.
Mannen møtte i tingretten i midten av mars, etter at han ikkje vedtok eit førelegg i august i fjor. Restauranteigaren meiner sjølv at han ikkje har servert ulovleg, og bad retten om å verta frifunnen. Det vart han ikkje.
Ifylgje domen serverte innehavaren ulovleg mellom 31. mars og 15. april i fjor. Tingretten har dømt mannen til å betala ei bot på 24.000 kroner. Om ikkje bota vert betalt, må han 24 dagar i fengsel. Domen er ikkje rettskraftig.
– Veneteneste
Restauratøren forklara i retten at han klaga på vedtaket då han vart nekta serveringsløyve av Kvam herad. Det var bakgrunnen for at han berre serverte «ta med-mat», forklara han. Det var merkt både på vindauga og døra til restauranten. Det var likevel ikkje tilfellet då to kontrollørar var innom tilfeldig.
Ein av kontrollørane fekk ifylgje domen servert ein kebab i lokalet. Han observerte dessutan andre gjester som hadde fått servering i restauranten.
Restauratøren forklara at han kjende til kontrollørane frå tidlegare kontakt, og at han serverte kontrolløren fordi han såg det som ei veneteneste. Dessutan dreiv han på den tidlegare eigaren sitt løyve, og ville ikkje eingong ha betaling for maten, hevda han.
Å driva på løyvet til tidlegare eigarar er ikkje lovleg.
– I strid med lova
Ifylgje forklaringa til mannen var det svært lite aktivitet og berre snakk om nokre få pizzaer om dagen i denne perioden. Også eit bursdagsselskap i restauranten var ei veneteneste, sa han. Han gjorde tenesta for ein mann som var handikappa. Han kunne ikkje seia nei til mannen, sa restauratøren.
Bakgrunnen for avslaget frå Kvam herad var ifylgje domen ei rekkje forhold knytt til skattebetaling og mattilsyn, og brot på reglar om arbeidsavtale og registrering av arbeidstid. I vedtaket skriv Kvam herad at restauratøren ikkje vil eller kan retta seg etter reglar og fristar. Heradet meiner dessutan at brota ikkje er enkelttilfelle, men gjentakande.
Tingretten festa ikkje lit til forklaringa til restauratøren. I dette tilfellet er det på det reine at det er drive serveringsverksemd i strid med lova, står det i domen.
