Serverte frukost og informasjon
Alexander Hillerich meiner det er for vanskeleg for turistane å tinga i Hardanger. Han trur løysinga er nettportalen til Book Hardanger AS.
Hillerich er sjølv dagleg leiar i Book Hardanger. Verksemda driv nettstaden bookhardanger.com. Målet er å samla reiselivsaktørane i Hardanger på éin stad.
Fredag 3. november inviterte Hillerich til frukostmøte på Hardangerfjord Hotel i Øystese. På menyen stod mellom anna frukost og informasjon om konseptet. Til stades var representantar for både reiselivsnæringa og Kvam herad.
Erfaring frå Flåm
Book Hardanger baserer seg på provisjonsinntekter. Går alt etter planen, vert det mogleg å tinga dei første reiselivsprodukta via nettsida frå 2. januar.
– Når eg skal tinga eit reiselivsprodukt, ønskjer eg ikkje å gjera det via e-post. Det er for vanskeleg. Ein mister kundar dersom dei berre kan tinga via e-post. Eg vil kunna tinga direkte. Det kan kundane gjera via vårt konsept, seier Hillerich.
Hillerich, som byrja som dagleg leiar 1. april, fortel at han kom frå ei stilling som seljar og produktsjef i Norway´s Best. Der lærte han mellom anna mykje om turistnæringa i Flåm.
– Turistnæringa i Hardanger har mykje å læra frå Flåm. Særleg når det gjeld korleis ulike aktørar samarbeider for å oppnå målet: å få turistane til å bruka pengar, seier han.
Tredelt eigarskap
Turoperatøren Fjord Tour Group AS eig ein tredel av aksjane i Book Hardanger. Eidfjord kommune og Ulvik kommune eig til saman ein tredel. Eit knippe reiselivsverksemder eig den siste tredelen. Hillerich seier at han ikkje er oppteken av kven eigarane er.
– Me skal jobba for heile Hardanger, seier han.
Målet til Book Hardanger er ikkje å tena store pengar for eigarane.
– Eventuelle overskot skal brukast til å støtta turistnæringa i Hardanger, seier Hillerich.
