Serverer mat frå nytt kjøken
I over tjue år har Heidi Steinstø Helgheim bode gjester som har kome innom fruktgarden i Steinstø, på salt og søtt. No har ho flytta verksemda til Ålvik.
Det vart ei travel førjulstid for Helgheim, som bruka mykje tid på å pakka saman og frakta kjøkenutstyr og anna frå Steinstø til Folkets Hus i Ålvik. Då HF møtte henne i hennar nye lokal like etter nyttår, hadde ho så smått kome på plass i forsamlingshuset.
– Lyt tenkja nytt
Helgheim har vakse opp og er busett i Steinstø. I 23 år har ho teke imot og servert dei som har besøkt fruktgarden. I tillegg har ho drive cateringverksemd i mange år. No planlegg ho å halda fram med matlaginga i Folkets Hus, fortel ho.
Årsaka til flyttinga er at leigekontrakten med broren, Ola Steinstø, som eig garden og kakebua i Steinstø, gjekk ut, forklarar Helgheim. Kort tid etter fekk ho beskjed om at ho kunne få leiga lokale i Ålvik.
Tidlegare har Helgheim servert bussturistar lunsj i restauranten «Kjedlaren» oppe på garden, i tillegg til å ha drive Steinstø frukt- og kakebu, som ligg på nedsida av hovudvegen. Den nye plasseringa av verksemda fører til at ho lyt tenkja litt nytt, forklarar ho.
Von om enklare kvardag
Sjølv om Helgheim lyt gjera nokre endringar i drifta, vil ein stor del av arbeidet halda fram som før. Ho vil mellom anna fortsetja med catering. Litt syltetøy- og kakeproduksjon vert det nok også. Dessutan vil tilbodet om å nyta ein betre komlemiddag eller sundagsmiddag dukka opp att om ei stund.
Steinstøingen har ikkje som mål å tenkja større sjølv om ho må tenkja nytt. Heller motsett, forklarar ho. Etter mange år med mykje jobbing vonar ho å kunna skru ned tempoet nokre hakk. Mellom anna ynskjer ho meir tid til barneborna, og kanskje endåtil litt meir tid til husbonden, fortel ho.
Den nye lokaliseringa, gjer òg kvardagen litt enklare for dei to andre tilsette i verksemda. Dei er båe busette i Ålvik. No kjem dei seg lettare til jobben.
– Kanskje vert det også litt meir fri for min del, slik at eg innimellom kan vera heime og gjera ingenting. Eg har alltid levd i den tru at viss eg ikkje er på jobb, går sikkert ikkje ting bra. Dette lyt eg etter kvart leggja av meg, seier Helgheim.
Frå kake til catering
Då kokken frå Steinstø byrja med servering, var det mest som ein hobby. Ho jobba i helsevesenet og laga eplekaker «på si». Sidan har det berre balla på seg, forklarar Helgheim.
Foreldra hennar serverte kaffi og Marie-kjeks til gjestene då dei i si tid tok imot gjester og hadde omsyning på garden. Seinare byrja Helgheim med servering av eplekake til dei besøkjande. Opp gjennom åra har ho fått god trening i å laga og servera den populære baksten.
– Ein sommar tok me imot 14 bussar på éin dag. Dei fekk alle servert både eplemost, kaffi og eplekake, i tillegg omvising i frukthagen. Me var nok litt yngre og sprekare då, seier ho.
Etter kvart kom det ynske frå gjestene om ein skikkeleg lunsj. Dette førte til at Helgheim etter kvart byrja servera meir enn berre kake. Såleis vart det til at kjellaren til gardshuset vart gjord om til restaurant. Nøyaktig når ho byrja med catering, er ho usikker på.
I Steinstø har Helgheim selt meir enn berre kaker. I kakebua har det vore mogleg å kjøpa alt frå kaker og lefser til eplemost, hermetisert frukt, syltetøy, gelear og frukt og bær frå garden.
– Gler meg
Steinstøkvinna leiger både kjøkenet og kjellarsalen i forsamlingshuset i Ålvik. Ho har framleis litt produkt på lur, og på fryserommet står spann med eplemos klare til kaker, og bær til syltetøy.
Tidlegare har folk i Ålvik leigt kjellarlokalet til ulike private samkome og arrangement. Helgheim seier at ho skal gjera det ho kan for at denne ordninga skal halda fram. Verksemda kan også hjelpa til med mat.
– Men det skal ikkje vera nokon «tvang» å tinga frå oss. Dersom dei treng lokalet og vil gjera jobben sjølve, skal me finna ei løysing, seier ho.
Helgheim fortel at ho har funne seg til rette i det nye lokalet, og at ho kjenner seg velkomen.
– No gler eg meg til å starta litt på nytt.
Vinn-vinn-situasjon
Leiar i husstyret, Kåre Johnny Flotve, er glad for at Helgheim ynskjer å halda til i Folkets Hus.
– På denne måten bidreg me til at Heidi får halda fram, og me syrgjer for at huset ikkje vert ståande tomt, seier han.
Det har gått med mykje tid og pengar til å pussa opp delar av forsamlingshuset, fortel Flotve. Mellom anna vart taket bytt nyleg, på grunn av vasslekkasje. I tida framover er det fleire prosjekt som ventar. Dimed kjem den faste leigeinntekta godt med, seier styreleiaren.
Han fortel at husstyret og Helgheim har ein god dialog. Han forsikrar at leigeavtalen ikkje vil hindra andre i å leiga kjøkenet og kjellarsalen.
Flotve vonar at Helgheim vil bidra til meir aktivitet i bygda.
– No får me eit betre tilbod, der me kan treffast for ein matbit. Og om det til dømes kjem turistbussar innom henne, er det jo kjekt om me får moglegheit til å syna fram meir av det bygda har å by på, seier han.
