Ser potensial, saknar samkøyring
Det skjer mykje på matfronten i Hardanger, men marknadsføringa må inn i meir ordna former, meiner Jon Aga.
Jon Aga kjem til å invitera bransjen til samkøyring. Tanken er å samla mellom andre produsentar til ei form for idéverkstad etter nyttår som kan leggja grunnlaget for ei meir samla matsatsing i regionen.
Etter hans syn må kommunane og politikarane stilla seg bak initiativ, til dømes lokalmatbutikkar, med økonomisk stønad.
– Du kjem aldri til å få ein slik butikk til å gå med overskot, sa Aga då han fekk sleppa til på Hardangerkonferansen i Ulvik onsdag.
Slike butikkar må dessutan få høve til å selja sider, meiner han.
– Det har vore ølmonopol og er vinmonopol. Kvifor skal me ikkje laga eit siderpol? sa han.
Mat med historie
Han viste til at historia bak produkta må utnyttast i salet, og viste til salssuksessen med den skarprettarinspirerte sideren Bøddel. Han minte om at Hardanger har tilgang på ypparleg frukt, grønsaker og kjøt. Hardingane har ein unik sjanse til å kombinera lokalt produsert drikke med lokalt produsert mat.
– Me må få det i ordna forhold med ein plan for kva me skal gjera, og korleis me skal byggja det opp. Alle må bli med og bidra. Me er nøydde til å gjera det no, sa han.
Aga driv Utne Hotel, etter at han bygde opp Vega Havhotell til ein stor suksess på kysten av Helgeland. Saman med lokale krefter lukkast han med å gjera øya til eit reisemål for matinteresserte.
Med kvalitet
Også Christer Økland, direktør for mat og drikke i Fjordtind Hotels AS, tala til forsamlinga og deltok i ein samtale med Aga under leiing av direktør Andreas Skogseth i Visit Hardangerfjord AS. Han framheva at høg kvalitet er viktig i satsinga på mat.
– Dess meir pengar folk brukar, dess meir nøgde er dei, sa han.
– Kva er dei største utfordringane med å etablera Hardanger som ein matdestinasjon? spurde Skogseth.
– Å fortelja historia bak råvarene. Då får gjesten tilhøyrsle og får ei historie å vandra vidare med, sa Aga.
– Det handlar ikkje om akkurat kva du har på tallerkenen eller i glaset, men om å ha ein «connection», sa Økland.
– Korleis får me med oss den nye generasjonen til å bli interessert i kulinariske opplevingar? spurde Skogseth.
– Me må vel laga ein app. Eller eit spel, sa Aga til lått frå forsamlinga.
