Ser positiv utvikling i Hardangerbadet

4.222 besøk vart registrerte i august, syner statistikk Hardangerbadet AS har sendt Kvammabadet KF. I fjor, då anlegget vart underlagt besøksrestriksjonar og smittevernføringar, var talet 4.157 i den same månaden.

I alt hadde 25.622 vitja badet før september i år, mot 31.390 på same tid i fjor. I fjor var anlegget stengt i om lag tre månader før sommaren. I år var anlegget stengt i to kortare periodar i vår.

— Positiv utvikling

Dagleg leiar Bjarte Rasmussen i Kvammabadet har sendt tala vidare til Kvam herad, med kommentarar. Han meiner at med tanke på det gode vêret i sommarmånadene «må besøkstallene sies å være tilfredsstillende». Han meiner dessutan å sjå ei positiv utvikling i løpet av året.

Rasmussen meiner at dersom ein reknar med same besøkstal som i fjor resten av året, vil det samla besøket vera 42.000—45.000.

Budsjettet heradsstyret fekk presentert då Kvam herad gjekk inn i prosjektet i 2017, spådde eit besøk på 61.500 pluss det samla besøket 750 årskortinnehavarar utgjer. Sistnemnde besøkstal var ikkje talfesta i budsjettet.

Det er heradsstyret som har kravd rapportering av besøkstal, i samband med løyvinga av 1,5 millionar kroner i stønad til drifta i vår. I dei to fyrste rapportane fortalde statistikken kor stor del av besøka kundar med medlemskap utgjer. Desse tala er ikkje inkluderte i rapporten for august.

– Ikkje i vår makt

Kvammabadet har hatt fleire møte med Hardangerbadet om avtalane mellom partane. Styreleiar Bjørn Frode Skaar i Kvammabadet sa i styremøtet onsdag at ein kan rekna med ein ny førespurnad frå Hardangerbadet om økonomisk hjelp. Kvammabadet har ikkje makt til å ta stilling til ein slik søknad, og det har føretaket freista forklara til Hardangerbadet, sa han.

— Idet nokon tek opp underskotsdekning, er det utanfor vår avgjerdsmakt. Berre heradsstyret kan endra dei økonomiske føresetnadene i avtalen eller styrkja det kommunale tilskotet, sa Skaar.

Han reknar med at Hardangerbadet parallelt har ein dialog med Kvam herad.

— Me opplever at Hardangerbadet driv badet så økonomisk som det er mogeleg å få til, sa Rasmussen, som poengterte at fleire gjester i badet og gjester hjå Helse i Hardanger AS kan dra utviklinga rett veg.

Han sa at den nye daglege leiaren i Hardangerbadet, Anita Storemark, verkar å vera «på ballen» for å auka inntektene og gjera tilbodet betre.

— Eg har tillit til at dei gjer det dei kan gjera, sa Skaar.

Ikkje for ålmenta

Innan 1. oktober kvart år skal Hardangerbadet levera budsjett for billettinntektene året etter. Rasmussen opplyser at eit budsjett vart motteke kring 1. oktober, men at Kvammabadet har bede om eit nytt av di det hadde manglar.

— Det var ikkje leseleg korkje for meg eller meir rekneskapskunnige, sa han.

Hardangerbadet har varsla at eit nytt budsjett vil verta levert denne veka, opplyste Rasmussen.

Korkje det fyrste budsjettutkastet eller tilbakemeldinga er journalførte. HF har bede om innsyn i desse dokumenta.

Hardangerbadet sende besøksstatistikken 28. september. Rasmussen journalførte ikkje dokumenta før 14. oktober. HF fekk heller ikkje innsyn då statistikken vart etterlyst 7. oktober, men fekk onsdag dokumenta tilsende frå ordføraren.