Ser for seg promenade og park i Jondal: – Viktig med godt fyrsteinntrykk

Det argumenterer Hovden frå Kysnesstrand for i eit innspel til arealdelen til kommuneplanen for Ullensvang kommune.

Mange gjester kjem med ferja og får fyrsteinntrykket av nasjonalparklandsbyen før dei er komne på land. Det er viktig at denne fasaden mot Hardangerfjorden gjev et godt og innbydande bilete, skriv Hovden.

Strandvegen går i dag frå båthamna til kiosken Matkanten, med unntak av tre meter kai bak Spar, slik at ein må gå rundt butikken. Her burde det vore tilrettelagt for passering, slik at ein får ein samanhengande strandpromenade frå båthamna til Matkanten, meiner Hovden.

Den flotte strandlina i Jondal sentrum held fram utilgjengeleg i private hagar og strender, til elva. På andre sida av elva er det igjen ein hage med strand, og så svaberg før ein kjem til Hardanger House.

– Heile denne strekkja på om lag 350 meter er privat og utilgjengeleg, og det er synd. Her ligg store moglegheiter for å forbetra det gode ryktet til Jondal som ei idyllisk bygd, og ein kan lett sjå føre seg ein flott strandpromenade eller fjordsti frå Matkanten til hotellet, med gangbru over elva, skriv Hovden, som har publisert illustrasjonar av gangvegen i ei Facebook-gruppe retta mot jondølingar.

Han vil tru det er vilje i kommunen til å setja av stranda til fritids- og turistføremål.

– Om det vert ei kommunal investering eller eit spleiselag for å opparbeida grusveg og bru over elva, finn me ut, men fyrst må grunnen setjast av til føremålet, skriv han.

Fotgjengarbaserte sentrum er meir attraktive for både born og eldre. Norheimsund, Øystese og Rosendal har fått det til før. Ein gjer det same i Odda, og lagar strandpromenade frå Sørfjordsenteret til Almerket. Jondal sentrum bør bli det neste strandpromenadeprosjektet i Ullensvang, skriv Hovden.