Ser etter leiar

Avtroppande dagleg leiar Christine Fauskanger Molven har berre fint å seia om arbeidet. Jobben er fantastisk gjevande og meiningsfull, og ho har stortrivest i rolla, skriv ho i ein sms.

Gjennom arbeidet i frivilligsentralen har Molven møtt fantastiske menneske som står på og ofrar fritid for andre. Grunnen til bytet er at Molven skal tilbake i den førre jobben.

– Eg har valt å gå tilbake til stillinga mi i kommunen fordi eg av helsemessige årsaker ikkje klarar gjera jobben og fylla rolla slik eg ynskjer. Då er det betre for både sentralen og meg at andre overtek, seier ho.

Styreleiar Olav-Magnus Hammer synest det er kjedeleg at Molven sluttar. Ho har vore ein dyktig leiar og vert sakna, seier han. Heldigvis skryter både Molven og den førre daglege leiaren av jobben, seier han, og håpar at gode søkjarar vil melda seg.

– Me er på jakt etter ei rask avklaring no, då me skal inn i nye spanande prosjekt, fortel han.