Sentral på flyttefot

Sentralen flytta ikkje mange metrane. Dei siste åra har den halde til i det gamle posthuset i Jondal. No er den å finna i det tidlegare Nav-kontoret i det gamle kommunehuset, «Blåhuset».

Trong armslag

Leiar i sentralen, Christine Fauskanger Molven, fortel at det er fleire årsaker til flyttinga.

– Me trong meir plass. I «Blåhuset» har me fått både eit kontor og eit møterom. Dessutan trong me ein plass der det ikkje er direkte innsyn frå gata. No kan folk vitja oss utan at alle ser det, seier ho.

Flyttinga vart gjennomført den første veka i januar. Molven forsikrar at det nye kontoret er lett å finna.

– Det ligg i 1. etasje. Ein må gå forbi turistinformasjon og til venstre, så ser ein skiltet på døra, seier ho.

Opningstidene vert dei same som tidlegare, og flyttinga får ikkje negative konsekvensar for økonomien. Dei nye lokala er litt rimelegare enn dei gamle.

Fleire skal flytta

Gjenbruksbutikken held fram i posthuset inntil vidare, men før utgangen av mai skal også den få ny heim.

– Me har ingen planar om å leggja ned butikken, og arbeider med å finna nye lokale sentralt i Jondal. Utvalet er ikkje stort, men eg har stor tru på at det skal løysa seg, seier Molven.

Geir Johnson eig det gamle posthuset i Jondal. Han fortel at arbeidet med å finna ny leigetakar er i gang.

– Eg har jobba med ulike interessentar, men har førebels ikkje har fått napp. Me er fleksible og kan tilpassa kontora til behova leigetakarane har. Ingenting er verre enn at lokala vert ståande tomme, seier han.