Sende snap for å koronaåtvara unge

Kvam herad brukar Facebook og Snapchat for å nå fram til fleire unge med koronaåtvaringar.

Som HF skreiv tysdag, er det dei siste dagane observert grupper av særleg born og unge som står eller sit for tett saman. Til dømes skal det vera observert born som har spela fotballkamp i Øystese.

Informasjonsrådgjevar Øyvind Strømmen opplyser at for å nå fram til dei unge med formaningar om smittefare, har utekontakt Siriann Lillevik no sendt ut videomeldingar via Snapchat og Facebook. Dessutan er det hengt opp plakatar ved idrettsanlegga, opplyser han.

– Dette er ei tøff tid for dykk. De må stå i lag med oss andre om dugnaden og halda avstand til kvarandre for å stoppa spreiinga av koronasmitte, seier Lillevik til dei unge.

Ho slår fast at det ikkje er ofte dei unge vert oppmoda om meir skjermtid, men slik er det no. Dei unge bør ringja eller bruka sosiale medium for å halda kontakten og til dømes spela Fifa på nett i staden for å møtast og spela fotball, seier ho.

– Det er mange mogelegheiter der ute, seier ho.