Sende retningsliner i retur
– Gjer det enklare! sa politikarane om retningslinene for bruk av offentlege uteområde til arrangement.
Kvam formannskap valde ikkje å vedta framlegget frå rådmannen torsdag 7. mars.
– Det vart litt overveldande, sa Gjermund Stuve (Sp).
Den same innstillinga gjekk att hjå dei andre folkevalde i diskusjonen. Til liks med fleire av dei som sende inn innspel då saka var på høyring, er politikarane redde for at retningslinene vil råka den frivillige innsatsen.
Ifylgje rådmannen er målet med retningslinene for bruk av offentleg uterom til arrangement å gjera prosessane enklare og meir føreseielege for arrangørar, og å stilla krav til arrangørane.
– Me må passa oss for å gjera det for vanskeleg, sa Linda Haugland Jondahl (Ap).
To festivalar og to ulike svar
I forslaget om retningsliner står det til dømes at 17. mai-komitear må utarbeida ein risiko- og sårbarheitsanalyse (ROS). Stig Aase (Sp) undra om det er eit lovkrav eller berre eit råd. Ifylgje sakshandsamar Bente Valland Bovim er slike analysar noko Kvam brann og redning krev i samband med større arrangement.
Ordførar Torgeir Næss (Ap) meiner at føringane er logiske, men kan gje eit noko massivt inntrykk. Han spurde om mangelen på retningsliner har vore eit problem.
Det stadfesta Bovim. I fjor sommar til dømes, før Bygdalarm, vart heradet kjent med krav i støyforskrifta til arrangørar. Dette var nytt då det dukka opp – trass møte mellom arrangøren og fleire representantar for Kvam herad, politiet og helsetenesta i god tid før festivalen. Ingen tenkte på å invitera kommuneoverlegen, sa Bovim, og det vart «ganske mykje armar og bein» i rådhuset for å hjelpa til så godt ein kunne.
Bygdalarm fekk altså nei frå kommuneoverlegen til å spela musikk frå eit telt på meieritomta etter klokka 23. Då den same problemstillinga dukka opp i samband med ein bryggjedans i Øystese nokre veker seinare, hadde arrangøren søkt direkte til den ansvarlege for kaiar. Det gjorde at støyproblemet fyrst vart fanga opp rett før arrangementet. I den saka var vurderinga til kommuneoverlegen annleis, opplyste Bovim.
– Ein lettare versjon
Frp føreslo at heradet i samband med arrangement som krev nye sikringstiltak, som 17. mai, skal syta for sikringstiltaka med eige personell. Partiet føreslo at dersom arrangørar er avhengige av kontakt med eller løyve frå andre instansar enn Kvam, til dømes Statens vegvesen, skal heradet hjelpa til med naudsynt kompetanse.
– Berre eit fåtal i Kvam er skikka til å skriva ein skiltplan, sa varaordførar Frode Nygård (Frp).
Han presiserte at berre det å stilla seg i vegen for å dirigera trafikk krev omfattande opplæring og uniform.
– Eg kan tenkja meg å senda saka tilbake og få ein lettare versjon, sa han.
Rådmann Anita Hesthamar er skeptisk til forslaget, som ville ha gjort Kvam herad ansvarleg som medarrangør. Det er vanskeleg å finna balansen mellom naudsynt byråkrati, å tenkja praktisk og å vareta det frivillige arbeidet, påpeika ho.
Frp trekte forslaget. Formannskapet tilrådde samrøystes eit framlegg frå Sp om å senda saka tilbake til rådmannen med mål om å forenkla retningslinene – eller rettleiaren, som fleire meiner kunne vore eit meir passande namn.
Saka vert dimed truleg utsett av heradsstyret torsdag 14. mars.
Les også:
