Selde Kvamnet AS: – Viktig for oss med lokal eigarskap

Fleire interessentar – også store aktørar – har banka på døra opp gjennom åra, røper den daglege leiaren. Men fyrst då Energiselskapet Hardanger AS melde seg, vart dei 14 aksjonærane samde om å selja.

Dimed vert Kvamnet systerselskapet til fire andre aktørar som er dotterselskap av EH. Mellom dei er Hardanger Energi Breiband AS, eit resultat av oppkjøpet av Okapi AS og Kinsarvik Breiband AS i 2022. Dei andre er kraftprodusenten Hardanger Energi AS, kraftnetteigaren Indre Hordaland Kraftnett AS og fiberentreprenøren Teltech AS.

Samtalane om handelen har gått føre seg i eit år eller to, men har vore intensivert sidan september i år. Avtalen om kjøp av selskapet vart signert 5. desember. Partane er samde om å halda kjøpesummen konfidensiell, fortel dagleg leiar Steinar Foss Andersen i Kvamnet.

– Men eg kan seia at både kjøpar og seljarar er nøgde. Me har funne ein god balanse, seier han.

Framleis lokalt

Andersen eig i lag med Johannes Berge det som var den største aksjonæren i Kvamnet, nemleg Kvamnet Holding AS, som sat på vel 55 prosent av aksjane. I tillegg åtte Andersen personleg ein mindre del. Dei andre eigarane var både privatpersonar og lokale verksemder.

Den daglege leiaren framhevar fylgjande argument for valet av kjøpar:

• Seljarane ynskjer å halda aktiviteten lokal. Med EH, eigt av kommunane Ullensvang, Eidfjord og Ulvik, som eigar sikrar ein ei lokal forankring.

• Finansiering av utvikling og investering vil vera finansiert minst like godt som tidlegare.

• Kjøparen og seljaren samarbeider og kjenner einannan godt frå før, mellom anna gjennom utveksling av tenester og felles vaktordning, og vil halda fram med det. Selskapa har samarbeidd heilt sidan 2003, fyrst gjennom ein leigeavtale med Jondal Energi, seinare Hardanger Energi, som sidan utvikla seg til eigarskap.

• Lokal eigarskap vil sikra kundane god, lokal sørvis.

– Eg trur det er ein stor fordel for kundane at me er til stades lokalt, seier Andersen, som meiner verksemda strekkjer seg langt og yter ein del meir enn ho må.

Han er overtydd om at selskapet er i kompetente hender som vil ta godt vare på dei tilsette, som får fleire kollegaer.

– For dei tilsette vert det nok berre meir spanande, med fleire å arbeida i lag med. Dei flyt allereie i dag litt over i kvarandre gjennom samarbeidet vårt, seier han.

Snart 25-åring

Den fyrste kunden til Kvamnet, Hardanger Bygg, vart kopla til nettet i november 2000. Sidan er talet på kundar gonga med 4.200. Det er truleg investert for kring 200 millionar kroner i sentralar, stamliner, maskiner og system og mykje anna utstyr i eit omfattande system, fortel Andersen.

For kring 15 år sidan kom ei rekkje nye aksjonærar til, då banken pressa verksemda til å skaffa større kapital. Det lukkast ho med. Nokre av aksjonærane har sidan trekt seg ut, men fleire hang framleis med fram til salet.

Samla vil kundane til Kvamnet og eit av dei nye systerselskapa som tilbyr tilsvarande tenester, Hardanger Energi Breiband AS, verta om lag 7.700 i talet.

Verksemda var i starten i tvil om kva som var lurt å satsa på, men enda med å satsa på trådlause løysingar og ikkje nytta det gamle koparnettet til Telenor. Sidan er fibernettet bygt ut og kundane sakte, men sikkert flytta over dit. Framleis får kring 40 prosent av kundane trådlause tenester. Nye prosjekt som er undervegs, vil redusera dette talet.

– Eg har lika jobben min veldig godt. Det har vore ei spanande tid, seier Andersen.

– Det må vera litt spesielt for deg å selja noko du har bygt opp stein på stein?

– Ja, eg kjenner ikkje spesielt stor glede. Men ein lever ikkje evig.

Ideen kom til

Frå starten var ikkje Kvamnet, som voks ut frå rekneskapskontoret til Kjell Skeie, tufta på ideen om å tilby kundane internettilgang. Andersen minnest då Telenor på slutten av 1990-talet sukka tungt over eit ynske om ei line på 1 megabit til Øystese. Prisen ville vera 7.000 kroner i månaden. Ut frå den høge kostnaden voks tanken på å syta for sitt eige nett internt i Kvam. Så dukka ideen om å tilby kundane internettilgang opp.

– Me kjøpte fire megabit frå BKK for 36.000 kroner i månaden, og kunne leiga ut lina. Det er sant! seier Andersen.

– Så vart det eit veldig sug i marknaden og spørsmål om kvar me kunne byggja. Folk og kommunen spurde oss: «Kan de ikkje setja opp ein sendar der òg?» Så kom det tilskotspakkar til utbygginga.

Då veksten var som størst, var Kvamnet ei såkalla gasellebedrift. I dag er det meste på plass og omsetninga meir stabil, og drifta handlar mest om å ta vare på anlegga, seier Andersen.

Godt sikra, men …

Han påpeikar at hardingane har tre «hovudvegar» for internettilgang inn i det lokale, ringforma nettet med ein fart på 100 gigabit per sekund. Såleis er nettet sterkt og brukarane i Hardanger godt sikra. På den andre sida førekjem det at nettet fell ut.

– Det skjer, men det er sjeldan, seier Andersen.

Dagens spente internasjonale situasjon og krigføring gjer nettet til eit særleg utsett punkt, påpeikar han. Og kva skjer om det forsvinn over tid og me knapt får gjort noko som helst?

– Det er ganske skremmande å tenkja på, eigentleg, seier han.