Sel ut maten og stengjer døra

Førjolstida og romjola skulle vera ei tid for sosiale samkomer med god mat og drykk på Hardangerfjord Hotel. Aukande smitte og nye koronatiltak denne veka stikk kjeppar i jola for hotellet.

— Sjølv om me ikkje får servert han på hotellet, vil me gje folk moglegheit til å kosa seg med den gode maten vår, seier hotelldirektør Tanja Borge.

Ifylgje henne er det ein del varer på matlageret som bør både nyttast og nytast. Ho fortel om kreative tilsette som saman har lagt ein plan for korleis dei skal få maten ut og unngå matsvinn.

Torsdag og fredag ettermiddag lagar dei til ein såkalla «pop-up-jolebutikk» der folk kan kjøpa med seg alt frå pinnekjøt og lutefisk til jolesaus og drykk.

Torsdag ettermiddag er Rickard Willemoes ein av dei som tek turen innom utsalet til hotellet. Han sikrar seg både pinnekjøt og lutefisk. Willemoes tykkjer det er viktig å støtta opp om det lokale. Pinnekjøtet til Arne Fykse har han ete tidlegare, medan lutefisken er meir ukjend.

— I år prøver me oss på noko nytt og kjøper lutefisk òg. Svigerfar har gått god for det, seier han.

– Ikkje kjekt

Hotelldirektøren fortel at ho er spent på tida som ventar. Fredag er truleg siste dag med opne dører i år. Etter at dei siste avlysingane har tikka inn, ventar ikkje hotellet fleire overnattingsgjester. Situasjonen er krevjande både for direktøren og medarbeidarane. Det har gått frå helger med fullt hus til at det gradvis har minka på gjestene. Borge er bekymra for medarbeidarane sine.

— Dette er ikkje kjekt. Eg har fantastiske kollegaer som eg ikkje ynskjer å mista. Eg håpar dei held ut. Dei er eit utruleg flott team som eg trivst vanvittig godt med, seier ho.

Trass tøffe tak på tampen av året mister ikkje hotelldirektøren all von.

— Eg har store forventningar til 2022. No tek me ein noko lengre joleferie, så vonar eg at me snart kan halda fram med å by på god mat og sørvis, seier Borge.

Skulle stengja

På Thon Hotel Sandven i Norheimsund er det ope for gjester i helga. Måndag føremiddag stengjer hotellet for jola, fortel hotelldirektør Arnstein Birkeland.

Ifylgje han har jolestenginga vore planlagd sidan tidleg i vår, og har såleis ikkje noko med dei siste smitteverntiltaka å gjera. I romjola vil tida verta nytta til anna arbeid, mellom anna oppussing av kjøkenet.

Også på hotellet i Norheimsund står det att ein del matvarer etter avlyste jolebord og andre tilstellingar. Direktøren fortel at det ikkje er snakk om store mengder, då bestillingar har vorte gjorde litt etter litt.

Ein del av maten vil hotellet vakuumpakka og frysa ned. Andre varer, som til dømes grønsaker, vil dei tilsette få høve til å ta med seg heim, fortel Birkeland.