Sel planter som aldri før
Medan koronaviruset gjer at mange verksemder slit med omsetninga, melder både Gimle Planteskule og Hagesenter og Berge Gard & Gartneri om travle tider.
– Det er nesten så eg skjemst over å seia det no når så mange slit, men hos oss er salet veldig bra. Langt betre enn eg hadde frykta, fortel dagleg leiar for planteskulen og hagesenteret i Vikøy, Silje Aksnes.
– Eg såg svart på det då alt vart stengt i mars, men rundt påsketider var det som om noko skjedde. Sidan har det vore svært mykje aktivitet. Me har selt meir planter i år enn på denne tida i fjor, fortel dagleg leiar for gartneriet i Tørvikbygd, Anne Grete Berge.
– Folk investerer i hagen
Både Aksnes og Berge trur koronaviruset har gjort at folk brukar meir tid på hagen.
– Mange skal nok vera heime i sommar, og då har dei både tid og lyst til å investera i hagen. Truleg vert mange utsette hageprosjekt realiserte i år, seier Berge.
Særleg er interessa for nyttevekstar stor.
– Det har vore fokus på nyttevekstar som frukt, bær, krydder og urter i fleire år. I år verkar det som om etterspørselen er større enn nokon gong. Folk ønskjer i større grad enn tidlegare å dyrka sine eigne produkt. Kanskje vil fleire verta meir sjølvberga? seier Aksnes.
Fleire verksemder slit med å få tak i nok arbeidskraft, sidan landegrensene er stengde. Korkje Aksnes eller Berge har dette problemet.
– Dei fleste som arbeider på planteskulen og hagesenteret, er frå Kvam. Me har to flinke karar frå Litauen. Dei byrja jobba 1. februar og kom til landet før virusrestriksjonane, fortel Aksnes.
Har avlyst alle arrangement
Berge Gard & Gartneri sel ikkje berre eigenproduserte og innkjøpte planter. Gartneriet er òg vertskap for ulike arrangement. Mellom anna har onsdagskafeen vorte ein tradisjon. Gartneriet har dessutan hatt ulike kulturarrangement. Ikkje mange veker før viruset kom, var til dømes gartneriet fullt då komikar og forfattar Are Kalvø stod på scena i februar.
Berge fortel at onsdagskafeen er avlyst på ubestemt tid. Det same er andre planlagde arrangement denne våren.
Gartneriet har fått tilbod om å hasa eit arrangement med Linda Eide og Sjur Hjeltnes i september. Berge er usikker på om ho kjem til å takka ja til tilbodet.
– Dette er eit arrangement me godt kunne ha tenkt oss, men det er vanskeleg å leggja planar for hausten når me ikkje veit kva me får lov til å arrangera. Uansett ønskjer me ikkje å vera vertskap for noko som i verste fall kan gjera at folk vert smitta, seier ho.
