Sigrid Karin Djupevåg Dolve og Gunnar Dolve dreiv tidlegare med pelsdyr, men måtte avslutta drifta. No er det dyrking av grønsaker som gjeld. Her saman med dotter Ingeborg Dolve.

Sel ferske grønsaker

Sigrid Karin Djupevåg Dolve og Gunnar Dolve driv Hauane Hagebruk på Ljones. Dei dyrkar og sel grønsaker av mangt slag.

Journalist
Publisert Sist oppdatert

Paret byrja å selja grønsaker for tre år sidan. Vona var å få meir aktivitet og produksjon på garden.

– Me ynskte å gje folk eit tilbod om ferske varer, seier Sigrid Karin.

– Me trur det er kvaliteten på varene som er avgjerande for om folk handlar, fortel Gunnar Dolve.

Opptekne av kvalitet

For dei er det viktig at grønsakene har god kvalitet. Ekteparet dyrkar mellom anna salat, kål, løk, rotgrønsaker, sukkererter og tomat. På seinsommaren og hausten er utvalet størst. Då kjem mange og handlar.

– Me sel mange hundre kilo poteter og gulrøter, i tillegg til dei andre sortane, fortel Gunnar.

Dei tre siste åra har ekteparet lært meir om kva kundane ynskjer å kjøpa og kva som er enkelt å dyrka.

– Det er også kjekt å klara å produsera grønsaker som er krevjande med tanke på vekstvilkår, fortel Sigrid Karin.

Rader med grøne vekstar strekkjer seg bortover på Hauane Hagebruk.

Påfyll dagleg

Kvar dag må salsbua fyllast med ferske grønsaker. Ekteparet tykkjer det er kjekt arbeid, sjølv om det ofte tek litt tid. Grønsaksbua er sjølvbetent. Ifølgje Sigrid Karin er det enklast både for ekteparet og kundane.

– Det er ei enkel og sutlaus løysing. Kundane skjønar kva dei skal gjera, og me opplever ikkje noko svinn, seier ho.

Både lokalfolk og tilreisande kjem for å handla grønsaker. Ekteparet fortel at omsetninga aukar kvart år. Både Sigrid Karin og Gunnar har arbeid utanom garden.

natur og miljø landbruk fritid nyhende mat og drikke
Laga med Labrador CMS