Seks nye er smitta i Ullensvang

Både skulen og barnehagen i Jondal er råka av smitten. Kommunen ottast eit stort utbrot.

Seks nye, og dermed totalt ni, er påvist smitta i Ullensvang sundag. Fem av tilfella er påviste med snøggtestar. I alt er 70 i karantene no, pluss mange i ventekarantene.

Jondal skule har born i ventekarantene i skulefritidsordninga og på 3. og 4. trinn, til saman 28 elevar og 11 tilsette, melder kommunen sundag kveld. Skulefritidsordninga er open.

I Jondal barnehage er to avdelingar stengde av di i alt 39 personar er i ventekarantene.

Også Hestavoll barnehage, Odda barneskule og Vaksenopplæringa er råka av smitten. Barnehagen er heilt stengd. Vaksenopplæringa kjøper ein skuleplass i Norheimsund, og tenesta der er varsla.

– Kommunen vil åtvara sterkt mot sosiale samkomer. Situasjonen er alvorleg og kommunen kan raskt få eitt stort smitteutbrot. No er det særs viktig at innbyggjarar og besøkande held seg til dei strenge smittevernråda, heiter det i rapporten i kveld.