Seks involverte i kollisjon i Kvam – fem vart sende til sjukehus

To personbilar med i alt seks personar krasja front mot front i Strandebarm laurdag kveld. Fem vart sende til sjukehus.

Ulukka på fylkesvegen mellom Haugatun og Strandebarmstunet vart varsla til politiet klokka 18.01, melder Vest politidistrikt på Twitter.

Seks personar var involverte — fem personar i den eine bilen og éin person i den andre. Dei var ved medvit og kom seg ut av køyretøya etter ulukka.

Fleire av dei involverte fortalde om smerter på ulike stader på kroppen, men ikkje alvorlege skadar, melde operasjonssentralen. Den eine føraren vart send til kontroll ved Haukeland universitetssjukehus. Fire i den andre bilen vart sende til sjukehuset på Voss, medan den siste vart send til kontroll på legevakta, opplyser innsatsleiar og politioverbetjent Jarle Sjo Myklebust i Kvam, Samnanger og Tysnes lensmannsdistrikt til HF.

Han seier det er for tidleg å slå fast kva som var årsaka til ulukka, men politiet mistenkjer at den eine bilen har kome over i feil køyrefelt. Førarkortet til føraren, ifylgje Bergens Tidende ein mann i 70-åra, er difor kverrsett, opplyser Myklebust. Politiet mistenkjer ikkje køyring i stor fart.

— Saka er under etterforsking. Me satsar på å få snakka med dei involverte partane i dagane som kjem, opplyser Myklebust torsdag.

Fylkesvegen vart stengd ved ulukkesstaden etter ulukka, men vart ei tid etter opna for trafikk att etter at den eine bilen var flytta. Bergingsbil vart tinga.