Seier nei til ny hytte i Hamlagrø
Raudekrossen får ikkje byggja den ynskte hytta ved Hamlagrøvatnet. Kvam herad har teke for lett på fleire krav i lova, slår Statsforvaltaren fast.
Statsforvaltaren har nemleg gjort om det politiske vedtaket i Kvam herad 8. mai om å gje dei naudsynte dispensasjonane og løyva som gjer det mogeleg å dela frå tomta og reisa eit nytt bygg på henne.
Vedtaket opna for at Øystese Røde Kors Hjelpekorps kunne byggja seg ny lagshytte ved Lii, som erstatning for dagens hytte, «Dyrbu», på Klubben.
Fleire klaga på det kommunale vedtaket om å dispensera frå kravet om reguleringsplan og byggjegrensa langs vassdrag. Planutvalet i Kvam avviste klagane 18. september.
– Manglar i sakshandsaminga
Nokre av grunnane til at Statsforvaltaren gjorde om vedtaket, er fylgjande:
• Sidan hytta ikkje er ein fritidsbustad, skulle det vore søkt om dispensasjon frå arealføremålet i området, som er fritidsbusetnad. Det vart ikkje gjort.
• Søknaden seier ikkje noko om korleis kravet i plan- og bygningslova om tilgang til drikke- og sløkkjevatn kan stettast, eller om det krevst løyve til å sleppa ut vatn frå to vaskar og ein dusj som er viste på teikningane.
• Auka bruk av avkøyrsla frå fylkesvegen føreset fylkeskommunal godkjenning. Denne godkjenninga må liggja føre før heradet kan gje løyve til frådeling. Kvam herad gav løyve på vilkår av godkjenning før det vert gjeve igangsetjingsløyve, noko det ikkje er rom for i lovverket.
• Tilkomevegen og parkeringsplassen, og kanskje ein liten del av hytta, ligg i eit aktsemdområde for flaum. Søkjaren skulle ha fått krav om å kartleggja flaumrisikoen.
– Ikkje dokumentert rett
Parkeringslaget Hamlagrøosen, som var ein av dei som klaga på vedtaket i Kvam herad, meiner mellom anna at lån av to parkeringsplassar ikkje held, med tanke på at hjelpekorpset vil leiga ut den nye hytta til skuleklassar og lag. I tillegg hevda laget mellom anna at det ikkje var nokon veg fram til hytta, berre ei tørrlagd strandsone når vatnet er nedtappa.
Statsforvaltaren er samd i at den planlagde parkeringsdekninga ikkje vil stetta trongen og den skisserte bruken. Ho viser til at det ikkje er dokumentert nokon vegrett på ein «sommarveg» langs vatnet til parkeringsplassen ved hytta. Ein annan parkeringsplass som er omtala i søknaden, ligg for langt vekke til at han kan reknast med. Difor kan berre to leigde plassar teljast, men desse ligg i aktsemdområdet for flaum. Det talar mot å dispensera frå plankravet, ifylgje saksutgreiinga.
Statsforvaltaren konstaterer elles at partane i saka ikkje er samde i synet på om hytta skal plasserast i eit område med myr. Rådmannen i Kvam skriv i sakspapira at det uansett ikkje er snakk om fleire enn 205 rutemeter myr.
– Me meiner 205 rutemeter ikkje er ubetydeleg, skriv Statsforvaltaren, som minner om statlege ordrar om å ta vare på våtmark.
Statsforvaltaren meiner at det «slik saken er opplyst» ikkje er mogeleg å slå fast at omsyna bak føringane det er gjeve dispensasjon frå, ikkje vert vesentleg sette til sides. Ho avslår difor båe dispensasjonssøknadene. Kanskje kan vilkåra vera stetta om saka vert betre opplyst i ein ny søknad, står det å lesa.
Med ein reguleringsplanprosess vil ein få betre grunnlag for å avklara kva område som kan nyttast med minst negative fylgjer for klimaet og naturmiljøet, og for å vurdera alternative tomter, heiter det.
Brot med miljøet?
Fleire andre hytteeigarar i området som klaga, hevda at parkeringsplassen og vegen til den nye hytta vil bryta med det som er vanleg i hyttefeltet. Dei ottast dessutan støy i samband med utleigeverksemda og utslepp og lukt frå avløp. Vidare meiner dei at aktiviteten ikkje passar inn i eit område som er sett av til fritids- og turistføremål, og at det er uheldig å byggja i myr. I klagane er det elles hevda at føremålet med hytta med 22 sengeplassar verkar å vera næringsverksemd, og at storleiken bryt med miljøet kring hytta.
Hjelpekorpset svara på og avviste påstandane i tur og orden. Mellom anna viste laget til at hytta må vera stor for å ta godt vare på meir utstyr og letta rekrutteringa, og at utleiga til skuleklassar vil vera avgrensa.
Statsforvaltaren har forståing for at ei beredskapshytte treng veg og parkering på tomta, men meiner det er «betenkelig» at vegen langs vatnet ligg under vatn i delar av året. Det at dei andre hyttene ikkje har veg til døra, og at tomta ligg innanfor byggjegrensa langs vassdraget, talar for ein planprosess, skriv ho.
Det er ikkje mogeleg å klaga på vedtaket til Statsforvaltaren. Kvam herad og Øystese Røde Kors har avtala eit møte om saka 13. januar.
