– Sei ja til badstove!
Badstova ved båthamna i Strandebarm ser ut til å verta godkjend.
Rådmannen tilrår nemleg planutvalet å gje Strandebarm Idrettslag dei naudsynte dispensasjonane og løyva til tiltaket når saka vert drøfta 5. februar. Det tilrådde vilkåret er at badstova skal vera open for ålmenta.
Rådmannen ser ikkje store ulemper med tiltaket, som er tenkt plassert i eit område kalla «Skrotagjelet» på gard nummer 121/140. Tidlegare var planen å lokalisera det nærare båthamna, men etter ein del om og men vart det flytta. Det aktuelle området er uframkomeleg og tilgrodd.
Idrettslaget skreiv nyleg under på ein intensjonsavtale med Kvam herad om plassering av badstova og tilkome på kommunal grunn. Søkjaren har dimed tilgang til grunnen, slik plan- og bygningslova føreset.
– Badstova vil gje mangfald og attraktivitet til friområdet og vera ope for ålmenta. Bygget er plassert slik at det er gåavstand til rullestolrampe ved småbåthamna. Det er mange trivnads- og helsemessige fordelar med badstova, skriv rådmannen, som meiner bygget har ei spennande utforming som vil vera eit gode for det ho kallar «nærlandskapet».
Tiltaket på 23 rutemeter framkalla ei administrativ saksutgreiing på 13 sider, med andre ord bortimot to rutemeter per side.
Les også:
