Satsar stort på Omastrand

Inntil femti hus og hytter kan verta reiste i området om prosjektet vert gjennomført. Så langt er det på plan- og teiknebrettet. Etter kvart skal politikarane ta stilling til eit såkalla planinitiativ som heradet enno ikkje har motteke.

Det aktuelle området ligg vest for Gjerdaneset. I ein del av området, nær fylkesvegen, står framleis murar etter brakker som hyste leigearbeidarar ved verftet Fjellstrand. Planen er å bruka desse murane opp att til nærings- og husværebygg.

Nærare sjøen er vona å reisa bustader og ei rekkje frittliggjande einebustader. Båthamna, som er tiltenkt både hyttefolk og fastbuande, er plassert ved Saltvika.

– Hamna er nøkkelen

Dagleg leiar Ståle Rørlien i Voss Byggsenter og grunneigaren presenterte prosjektet for planutvalet 9. mai. Dei understreka at båthamna er ein nøkkelfaktor som må på plass tidleg, ettersom båtplass vil vera noko av det som gjer hytter og hus meir attraktive for mange.

Rørlien stipulerer salsverdien av prosjektet til to hundre millionar kroner om ein reknar eit snitt på fire millionar per eining. Omfanget av endeleg utbygging avheng av pågangen og er usikker. Kanskje vil ein starta med området som allereie er regulert til bustader. Verksemda har involvert seg fordi ho trur økonomien i prosjektet kan vera leveleg, påpeikar Rørlien.

Båthamna er ikkje med i kommuneplanen. Tufta minte om at ei hamn ved Omaholmen vart teken ut i siste liten. Hadde ikkje det skjedd, hadde den planlagde hamna vorte fremja i prosessen. Området treng ei båthamn, meiner Tufta. Han viste til at det er mogeleg å kjøpa plass på Bakka eller i Strandebarm, men minte om at det er trendy i eit miljøperspektiv å køyra minst mogeleg.

– Eg er sikker på at om me får til båtanlegget, er det veldig liv laga. Me har klare idear om korleis det skal gjerast, sa Tufta.

Ikkje berre spenstig

Fleire folkevalde rosa satsinga, men også suter kom på bordet: Prosjektet vil ta landbruksareal, og hamna er ikkje med i kommuneplanen.

– Kjempespenstig, sa utvalsleiar Ottar Randa (H) som trur prosjektet vil gagna ei bygd som «ikkje er verdas navle».

Vigdis Håland oppmoda om å tenkja heilskapleg frå starten. Silje Aksnes (Sp) er spent på korleis estetiske omsyn vert tekne når ein skal byggja i relativt bratt terreng. Ho oppmoda om å dyrka det som finst der og gjera det til eit mogeleg salstriks.

Rørlien seier det er viktig å gjera dei rette inngrepa, men poengterte at det er eit mål at kjøparane skal få ei panoramakjensle av utsikta.

– Me må laga noko som er litt annleis enn alle andre hyttefelt, sa han.

Utbyggjaren hadde vona å handsama den såkalla prinsippavklaringa før sommaren, men rådmannen har gjeve melding om at det ikkje lèt seg gjera.