Satsar på spreidd utdanning trass avvikling av stifting

Det same er alle avtalar mellom SHIH og Kvam herad, skriv dagleg leiar Sara Lundal Tokheim i eit brev til heradet. Ho opplyser at alle spørsmål om stiftinga heretter skal rettast til Næringshagen i Ullensvang AS.

Lotteri- og stiftingstilsynet har oppheva stiftinga etter søknad frå stiftinga sjølv.

— Avviklinga vil ikkje ha kjempestor betydning for utdanningstilbodet, men frigjera ressursar til å arbeida med det desentraliserte utdanningstilbodet i Hardanger, seier Tokheim, som er prosjektleiar og kompetansekoordinator i Næringshagen i Ullensvang.

Næringshagane i Voss, Hardanger og Ullensvang og Kvinnherad Næringsservice har inngått eit formelt samarbeid om å arbeida med eit desentralisert utdanningstilbod.

— Me hentar utdanningstilbod frå dei utdanningsinstitusjonane som kan levera ut frå dei kompetansebehova som vert avdekte. Høgskulen på Vestlandet (HVL) og Fagskulen Vestland er to viktige samarbeidspartnarar som me jobbar med, opplyser Tokheim i eit straumbrev til HF.

Styret har avgjort at dersom det er pengar att i stiftinga, skal dei overførast til Næringshagen i Ullensvang. Dette har Lotteri- og stiftingstilsynet godkjent.

Ingen eigenkapital

Stiftinga hadde ikkje eigenkapital ved årsskiftet. Koronapandemien forverra den økonomiske situasjonen og endra tilgangen på studium. Kostnadene heldt fram, samstundes som inntektsgrunnlaget og leveransen av studium fall bort. Stiftinga har likevel ingen kreditorar.

Grunnen til at SHIH vart avvikla, var at det gjekk veldig mykje tid og kostnader med til administrative oppgåver som styremøte og rekneskap. Ved å leggja dei oppgåvene som stiftinga hadde inn under næringshagane, kan ein skipa til fleire prosjekt, trur Tokheim.

Då vil ein få tilgang til meir pengar og slepp dei litt unødvendige kostnadene. Vonleg vil ein kunna arbeida meir med tilbodet og studentane, ifylgje Tokheim.

Trur på kompetanseheving

Næringshagen samarbeider med HVL. Han har eit tilbod som høver til det det er behov for i Hardanger. Etter kvart vil næringshagen kartleggja behovet nærare, seier Tokheim.

Koronapandemien har endra heile utdanningssektoren. Det har vore utfordrande, men Tokheim ser lyst på framtida og trur at det vil koma eit tilbod som vil høva til kompetansebehovet i Hardanger. Under koronapandemien har utdanningsinstitusjonane sjølve måtta avvikla mykje digital undervising.

SHIH har samarbeidd med Høgskolen i Innlandet, som har mange digitale studietilbod. Dette vil halda fram.

Desentralisering

Tokheim meiner at både regjeringa og distrikta har arbeidd lenge for å gjera fleire av studietilboda som har vore sentraliserte, tilgjengelege. Det er kome nye retningsliner, og Direktoratet for høgare utdanning og kompetanse har eigne stønadsordningar som skal byggja opp under desentralisert utdanning. Ein kan difor ta mange utdanningar utan å møta opp på ein studiestad.

— Vår oppgåve vidare vil vera å ha ein plass der studentane kan samlast. Det kan vera vanskeleg å motivera seg når ein sit heime og studerer, seier Tokheim.

Det er mykje som må på plass for å byggja opp ein modell som vil fungera for alle.

Viss det er personar eller verksemder som har kompetansebehov, så er det Næringshagen i Hardanger som fyrst og fremst vil kartleggja det og ha ansvar for å samla informasjon, fortel Tokheim.

I Kvam har SHIH hatt mellom 20 og 30 studentar kvart år dei siste åra.