Satsar på god bemanning året rundt

– Kvam herad har siste halvår har fått mange tilflyttarar som er på desperat jakt etter å få avklaring om barnehageplass i Kvam. Våre barnehagar er etter ordinært opptak «fulle», så me må melda frå til tilflyttarar om at dei må venta til neste opptak før dei kan vera trygge på å få plass. Dette er ikkje haldbart, og me må koma over i ein situasjon der me har barnehageplassar «på lager», skriv rådmannen i utgreiinga av saka.

Rådmannen ser fleire føremoner med den nye ordninga:

• Borna får ein tryggare og betre start på barnehageåret.

• Ein treng ikkje ta inn vikarar og kan fylla opp ledige avdelingar.

• Barnehagane vert meir attraktive som arbeidsplass.

Éi tom avdeling

For å gjera veg i vellinga, får barnehagane altså full bemanning frå og med august. Vel å merka vil ikkje den eine av tre avdelingar i Tørvikbygd verta bemanna før det eventuelt vert trong for å ta henne i bruk. Ei avdeling med 18 plassar står ledig på grunn av få søkjarar. Fleire har takka nei til plass der.

Kva overgangen til konstant god bemanning vil kosta i praksis, avheng av fleire usikre faktorar, så det veit ingen enno. Det vil rådmannen koma tilbake til i tertialrapportane.

Dei folkevalde tok likevel sjansen på å jubla ottelaust for tiltaket då det vart vedteke samrøystes av heradsstyret i slutten av mars. Fleire omtala saka som ei gladsak då saka vart handsama i til saman sju minutt i formannskapet og heradsstyret.

– Me må ha meir grunnbemanning og ha litt «slack». Eg er veldig nøgd med at me har råd til og vilje til å satsa på dette, sa Håvard Gjerde (R).

– Me har ikkje råd til å lata vera, sa Torgeir Næss (Ap), som meiner saka viser at Kvam herad satsar på oppvekst.

Sett med kommunale augo har auka grunnbemanning og auka driftskostnader éin hake: Også det kommunale tilskotet til den eine private barnehagen vil auka, sjølv om han ikkje endrar drifta. Tilskotet tek nemleg utgangspunkt i den kommunale kostnaden med drift av barnehagane.

Blanda røynsler

I 2021 innførte heradsstyret fire barnehageopptak i året, som eit to år langt prøveprosjekt. Evalueringa, basert på ei spørjegransking, syner at det er vanskeleg å gje alle plass i nett den barnehagen foreldra ynskjer. Arealmangel har vore ei utfordring som har ført til misnøye. Fleire har takka nei til plass på grunn av avstand.

Dessutan fører ordninga til meir meirarbeid med å administrera og organisera, av di opptaksprosessen må gjennomførast fleire gonger i året. Administrasjonen meiner det vert bruka for mykje tid på arbeidet.

Vidare kan born vert uroa og engstelege når det kjem nye born til avdelingane fleire gonger i året. Personalet må bruka mykje tid på å venja born til eit nytt miljø, og tilsette har vore nøydde til å arbeida meir enn ordinær arbeidstid. I nokre tilfelle krevst nytt utstyr, og tilsetjingar kan føra til «hol» i andre tenester.

– Det har vore få kvalifiserte søkjarar til ledige stillingar, og barnehagane har ikkje klara å bemanna opp avdelingar slik at alle barn har fått tilbod om plass, opplyser rådmannen.

På den positive sida har det vore bra å kunna gje søkjarane tilbod og gje foreldra større fridom. Vidare har det vore færre born på avdelingane i starten av barnehageåret.

Dei harde fakta

I inneverande barnehageår hadde 22 born fått plass gjennom løpande opptak då sakspapira vart skrivne. Det var tilsett folk i 6,7 årsverk.

24. februar var det ingen ledige plassar i barnehagane Sjydnahaugen, Sandven fus, Ålvik og Strandebarm ved starten av det komande barnehageåret. Flest ledige plassar hadde barnehagane Bjørketeigen og Tørvikbygd. Talet på ledige plassar kan vel å merka endra seg før august.

Maksimal kapasitet i barnehagane, om ein ser bort frå den ledige avdelinga i Tørvikbygd, er 526,5 einingar. Born under tre år tilsvarar to einingar, og born over tre år éi eining. Nyleg var det 356 born eller 492,5 einingar i barnehagane. Auken til 526,5 krev fleire nye årsverk og fører dimed til auka utgifter.