Satsar på draumejobben

Då Djupevåg var lita, ommøblerte ho stadig soverommet sitt etter leggjetid. Aller helst ville ho riva veggen mellom rommet og kontoret til faren, for å laga «walk-in closet». Det vart ikkje noko av.

– Eg ville også byta rom med mammo og pappen, for dei hadde veranda, men eg fekk ikkje lov, fortel Djupevåg.

Ho hjelpte stadig systrene med å rydda, og kjellarstova til familien gjekk gjennom fleire interiørprosjekt. Å leika med Barbie handla ikkje om dokkene. Nei, fokuset var heller på huset og innreiinga.

– Interessa har alltid vore der. Men ingen sa til meg på ungdomsskulen at ein kan jobba med interiør, fortel kvemmingen.

Dermed tok ho utdanning som barne- og ungdomsarbeidar. For fem år sidan opna det seg ei stilling hjå Fargerike Norheimsund. Djupevåg var klar for å prøva noko nytt. Gjennom jobben fekk ho god peiling på fargar og vart sertifisert fargerådgjevar. I vinter søkte kvemmingen om permisjon for å satsa på interiør.

– Det er litt skummelt å starta for seg sjølv i tida etter korona. Men eg følte at det var no eller aldri, seier Djupevåg.

Ho fortel at det ikkje er så mange som driv med interiørdesign i Kvam. Ifølgje Djupevåg er ikkje folk flest vande med å nytta seg av ei slik teneste. Interiørdesignaren ynsker ikkje å ruinera kundane, men kan heller ikkje jobba gratis.

– Det å setja ein prislapp på arbeidet har vore vanskeleg, men det kjem seg jo meir erfaring ein får, seier kvemmingen.

Luft og fargar

Det har vore mykje å setja seg inn i i den økonomiske delen av å driva eiga bedrift. Heldigvis har Djupevåg ei syster som kan hjelpa til. Til no har interiørdesignaren fått mange ulike oppdrag. Nokre kundar treng berre hjelp til å velja riktig farge. Andre vil gjera om på heile huset eller eit bestemt rom. Då er det både overflater, lys og møblering som gjeld.

– Folk tykkjer det er vanskeleg å sjå for seg korleis resultatet blir. Og nokon har mange idear, men manglar ein raud tråd i tankane sine. Eg hjelper med å laga ei heilskap, fortel Djupevåg.

Mange av kundane slit med å velja fargar. Djupevåg forstår at det er vanskeleg – ho har bomma på slikt sjølv. Ifølgje henne er endrar fargane seg ut ifrå kva lys ein ser dei i.

– Om det vert heilt feil når målinga kjem på veggen, er det berre å måla over med ein anna farge, seier kvemmingen.

Djupevåg har gått på nokre interiørsmellar. Både feil farge på veggen og for store møblar. Kvemmingen fortel at feilkjøp kan skje dei beste. Spesielt før ein lærer seg å sjå for seg kor stor plass ting tek i eit rom.

– Det er viktig med nok luft i rommet. Viss det er stappfullt med ting frå vegg til vegg, vert det kaos, seier interiørdesignaren.

Ho likar å kjøpa møblar som er moglege å endra på – til dømes ein sofa som består av fleire modular. Då kan ein flytta og justera slik ein ynsker. Ifølgje Djupevåg skal ein ikkje ha det likt rundt seg heile tida. Interiøret kan endra seg etter årstidene. Om det er å skifta ut eit putetrekk, kjøpa nytt golvteppe eller hengja opp eit bilete på veggen.

– Det skal ikkje så mykje til, fortel ho.

Glad i skåler

Retro og gjenbruk er stadig i vinden. Djupevåg tykkjer møbelbransjen har vorte flinkare til å nytta materiale om att. Tekstilar kan til dømes vera laga av resirkulert plast. Kvemmingen synest det er viktig å bruka norsk design i interiørprosjekta sine. Ho skildrar stilen sin som ei blanding av klassisk og nordisk.

– Eg likar diverre å gå på bruktbutikkar. Det vert heldigvis ikkje så dyrt, men skapet fyller seg fort opp. Kor mange skåler treng ein? seier Djupevåg med eit smil.

For henne er det ikkje så nøye om ein gjenstand er merkevare, så lenge formspråket eller fargen fell i smak. Djupevåg tykkjer det er viktig å tenkja på korleis møbleringa ser ut frå inngangen til rommet.

– Om ein vert møtt av sofaryggen når ein kjem inn i stova, kjenner ein seg ikkje velkomen, forklarer ho.

Møblar og mote

Interiørdesignaren likar å nytta ulike dufter for å skapa stemning i huset. Ein kan bruka både duftlys, -pinnar og -spray. Ifølgje Djupevåg treng ein ikkje ha same lukt i alle rom. Ho oppmodar om å finna ei duft som passar i heimen til den enkelte.

– Eit interiør er ikkje personleg før det viser kven som bur der. For all del ikkje kopiér naboen! seier kvemmingen.

Ifølgje henne kan ein ofte sjå korleis folk har det heime ut frå korleis dei kler seg. Djupevåg meiner at interiør og mote heng saman.

Djupevåg meiner at hagen er ein viktig del av heimen.

– Uterom og innerom skal snakka saman gjennom alle årstider, fortel ho.

Interiørdesignaren tykkjer lys er essensielt for å skapa riktig stemning både inne og i hagen. Ho er glad i planter, men fargerike sommarblomster er ikkje velkomne på tomta hennar.

– Eg tykkjer det er fint hos andre, men det vert for mykje farge for meg. Eg må ha det heilt roleg – då trivst eg best, fortel kvemmingen.

Ho er tilhengjar av lettstelte planter. Dersom ho kjøper ei ny potteplante til stova, startar interiør-kabalen. Djupevåg testar alle moglege plasseringar og forsikrar seg om at møblar og dekorasjonar går overeins.

– Plutseleg har det gått seks timar. Etter eit par endringar kan eg oppleva stova som ny, seier interiørentusiasten.

Delar av interiøret hennar har stadig permisjon, før det får koma fram att etter ein pause i boden. Eine systera til Djupevåg likar å flytta på tinga hennar og sjå kor lang tid det tek før interiørdesignaren oppdagar det.

Draumejobb

Kvemmingen er ein av 150 interiørdesignarar i landet som nyttar teikneprogrammet SkyHome. Der teiknar ho både interiør og eksteriør, slik at det vert lettare for kunden å førestilla seg resultatet. Det vert fort mange timar i kontorstolen medan kreativiteten strøymer over til dataskjermen.

– Når eg fyrst kjem inn i teiknebobla, har eg plutseleg gløymt å laga middag, fortel interiørdesignaren.

I tillegg til å sitja på kontoret har ho teke nokre oppdrag som «stylist» i hus som skal seljast. Då treffer ho gjerne meklar, fotograf og seljar, og samarbeider med dei for å presentera bustaden på best mogleg vis. Eitt av stylingoppdraga var i eit gamalt hus med mykje sjel.

– Det var ein draumedag! Sola skein, kjolen var på, og eg fekk framheva det flotte huset saman med fotografen, fortel Djupevåg.

Ho nyt kvar arbeidsdag som interiørdesignar. Nokre oppdrag dreg henne litt utanfor komfortsona. Ifølgje kvemmingen er det ofte desse ho lærer mest av.

– Eg er stolt over meg sjølv og det eg har fått til, seier ho.