Satsar på bad før kulturhus
Hardangerbadet kan få ein tøffare konkurrent med utandørsbasseng i Odda innan få år.
I samband med temaplanen for kultur oppstod ein diskusjon om prioritering av tiltak. Ap og H føreslo – og fekk mot tre røyster fleirtal for – å ta utvikling av Lindehuset som kulturhus ut av tiltakslista i planen og fjerna åtte millionar føreslegne kroner til føremålet.
Parti ynskjer i staden å bruka ti millionar kroner på utvikling av Odda Folkebad med utandørsbasseng. Ifylgje utvalsleiar Emil Tomasgard (Ap) er årsaka fyrst og fremst at tilbodet i større grad rettar seg mot born og unge enn det Lindehuset gjer. Partia vil bruka ti millionar kroner på tiltaket i perioden 2023–2026.
Tiltaket botnar i eit innbyggjarinitiativ som har munna ut i teikningar og eit konsept som tidlegare er presentert for dei folkevalde. Summen rommar to millionar kroner til prosjektering som er løyvde tidlegare.
– Har ikkje råd
Gard Folkvord (Ap) påpeika at Odda frå før har minst tre andre forsamlingslokale – Formannshuset, kinoen og Meieriet – som fungerer som kulturhus. Han meiner Lindehuset er, har vore og vil vera eit pengesluk. Kulturhus er ei motesak som i motsetnad til eit moderne badeanlegg som er ope i helgar og høgtider, ikkje er noko folkekrav, sa han.
– Me har ikkje hatt råd, har ikkje råd og kjem aldri til å få råd, sa han.
Anna Maria Kråkevik (H) meiner tilbodet, ikkje minst badetilbodet, til unge i Odda sentrum er altfor dårleg. Ho viste til kva ein får til av tilbod til dømes i Jondal, som Odda etter hennar syn ikkje kan måla seg med.
Kommunalsjef for kultur og næring, Kristian Bondhus-Jensen, påpeika at tanken bak den kommunale deltakinga er at ho vil gjera det enklare å få tak i pengar frå andre kjelder til å utvikla Lindehuset. I dag er det Kraftmuseet som driv huset med ein leigeavtale med kommunen i botnen.
Bibliotek som tilrådd
Lasse Tverdal (Ap) slo fast at han sakna jakt og fiske i kulturplanen. Han fekk alle med seg på å slå fast at ein skal ta vare på og styrkja jakt- og fisketradisjonar for å rekruttera born og unge. Etter hans syn er aktivitetane kulturarv.
Planen inneheld ei rekkje andre framlegg til tiltak, mellom anna ei investering i meirope bibliotek i Jondal på 150.000 kroner. Punktet var ikkje omstridt i utvalet. Møtet vart halde i kommunehuset i Jondal, og dei folkevalde var på synfaring i biblioteket før møtet.
Tiltaka i planen må finansierast i årsbudsjetta før dei kan realiserast. Temaplanen skal fyrst på høyring. Fristen vart etter framlegg frå Håkon Kvammen (KrF) utvida til 7. oktober.
