Satsa eller ikkje satsa?
Hardangerrådet er skeptisk til å korta perioden med turistbåtrute i Hardanger.
– Det er jo sagt at det skal satsast meir på skuldersesongane, seier ordførar Torgeir Næss (Ap) i Kvam herad.
Næss diskuterte framtida til turistbåtruta i eit møte i Hardangerrådet 18. januar.
I fylkesbudsjettet for 2024 vart det vedteke å endra tilskotet frå fylkeskommunen frå 6,6 til 4,6 millionar kroner i året. For å spara inn dei to millionane, må tilbodet reduserast, meiner fylkeskommunen, som føreslår å innskrenka sesongen med éin månad i kvar ende. Det vil seia å kutta tilbodet i april og oktober.
Hardangerrådet ynskjer derimot aktivitet heile året, og er skeptisk til å redusera tilbodet. Rådet gav i møtet uttrykk for at ein månad i kvar ende kan aksepterast, men fyrst vil rådet ha svar på kva det vil medføra i auka kapitalbehov at ruta held fram som før.
– Er det aktuelt for Hardangerrådet å auka tilskotet?
– Me vil sjå på det. Éin ting er kommunale gjevarar, men det kan godt vera næringslivet òg vil bidra, seier Næss.
Hardangerrådet har bede fylkeskommunen visa kva ei mindre avkorting eventuelt vil kosta hardangerkommunane i spleiselaget.
