Sander Eide Aase (t.v.) har fått praktikantplass hjå Nynorsk mediesenter. Her intervjuar han Sofie Kåreid for Kvammagampen, russeavisa ved Kvam vidaregåande skule, tidlegare i vår. Han har vore redaktør i år.
Sigbjørn Linga
Sander Eide Aase fekk ein av fem plassar
Før helga fekk han vita at han er ein av fem som er tildelt nynorskpraktikantplass i det 37. kullet hjå NRK Nynorsk mediesenter. Då hadde det berre gått dagar sidan han vart intervjua av mediesenterleiinga.
Aase har i fleire år vore helge- og ferievikar i HF. Han opplyser at det fyrst og fremst er dei gode opplevingane som lokalavisjournalist som fekk han til å søkja. I tillegg vil han gjerne læra meir om nye plattformer å formidla nyhende på. Det langsiktige målet er å få ein jobb der han kan formidla nyhende og gode historier.
Med seg i kullet får Aase fire jenter: Ingrid Nedrebø, Berit Helle Jonsbråten, Solveig Oddvarsdotter Myren og Sunniva Skurtveit. Dei set seg på skulebenken i Førde 22. august.
