Sander (18) byter ut elevrolla med valmedarbeid

Aase er ein av dei som har nytta seg av moglegheita til å røysta før sjølve valdagen 13. september. 18-åringen frå Tørvikbygd er ein samfunnsengasjert, ung mann, som kan fortelja at han per i dag har teke på seg 18 ulike verv. Han seier at det heile byrja med at han vart med i Kvam ungdomsråd for eit par år sidan, og sidan har det berre balla på seg.

Ein av grunnane til at Aase har førehandsrøysta, er at han skal jobba på sjølve valdagen. Då stiller han opp som valmedarbeidar, truleg som ein av dei yngste. Oppdraget takka han ja til då han vart spurd av Kari Weltzien Vik, administrativ rådgjevar i Kvam herad.

— Kvifor har du teke på deg oppgåva?

— Eg er oppteken av ein skal involvera seg og vera aktiv. Eg er nerd når det gjeld politikk og demokrati, og tykkjer det er viktig å bidra i demokratiet. Særskilt i år er det viktig å hjelpa til, då kommunen har stort behov for hjelp.

Engasjement gir fordelar

Aase ynskjer å gjera kvardagen betre for andre. Ifylgje 18-åringen er samfunnsengasjementet blant ungdom i Kvam veldig varierande. Om ein verkeleg skal engasjera seg, trur Aase at ein lyt ha hjartesaker som ein brenn for. Han oppmodar usikre jamaldringar til å nytta seg av dei ulike valomatane som finst, slik at dei får sett seg nok inn i partiprogramma til å villa røysta.

— Bruk stemmeretten! Det er noko av det viktigaste ein kan gjera, understrekar 18-åringen.

Det å engasjera seg politisk fører med seg fleire fordelar, ifylgje Aase. Han får eit innblikk og ei opplæring i politikk som han ikkje hadde fått utan å vera oppteken av det som skjer i samfunnet.

Ein annan fordel han nemner, er at han, trass alderen, fekk teke andre og siste vaksinedose før sommarferien var over.

— Du er no fullvaksinert. Kva tenkjer du om at du har fått «snika» i køen?

— Eg har eigentleg blanda kjensler. Eg vil jo ikkje vera ein som tek dosen frå ein som treng det meir. Samstundes skal ein møta på mange folk frå ulike husstandar den 13. september, og då er det greitt å vera rusta, svarar 18-åringen.

Plan B og C

Kari Weltzien Vik opplyser i ein e-post til HF at responsen på førehandsrøystinga så langt har vore god. Det har allereie kome inn brevstemmer, utanriksstemmer og stemmer frå kvemmingar som har røysta i andre kommunar. Per 26.08.2021 kunne ho informera om at Kvam herad hadde teke i mot 307 førehandsrøyster. 18 av røystene er sende til andre kommunar.

Biblioteka og fellessekretariatet på rådhuset tok imot 1233 førehandsrøyster totalt i 2017. Det kom inn totalt 1433 førehandsrøyster ved kommune- og fylkestingsvalet i 2019. Ved kommune- og fylkestingsvalet i 2019 var det kome inn 187 røyster frå kvemmingar innan 25.8.2019. Per 25.08.2021 var det kome inn 280 røyster.

Ifylgje Vik har tilrettelegging og organisering har gått bra, trass gjennomføring av stortings- og sametingsval samstundes med ein pandemi.

— Me må tenkja godt smittevern for både veljarar og valmedarbeidarar ute i vallokala våre, og ha alternativ B og C klart dersom me skulle få eit større smitteutbrot i Kvam når me nærmar oss valdagen 13. september. I tillegg har me måtta styrkja bemanninga, opplyser ho.

Eige lokale

Pandemien har ført til at det er oppretta eit eige vallokale på teststasjonen på Sandven i Norheimsund for dei som sit i karantene på grunn av korona. I tillegg til dette vil det òg verta nytta eit ambulerande røystemottak, informerer Vik.

Tanken er å kunna reisa heim til veljarar som sit i isolasjon eller karantene og ikkje kan ta seg fram til vallokalet på Sandven. Denne veka, veke 35, vil det vera valmedarbeidarar som reiser rundt på institusjonane for å ta imot førehandsrøyster.

I perioden 30. august til 3. september vert det lagt til rette for førehandsrøysting i Strandebarm og institusjonsval i Strandebarm, Norheimsund, Øystese og Ålvik.

I Ullensvang kommune kan ein førehandsstemma til og med fredag 10. september. I Jondal er det førehandsstemmemottak i kommunehuset. Det er ope måndag, onsdag og fredag mellom klokka 10 og 14.