Samlast til trim og prat

Denne våren vert Snakkatrimmen eit fast innslag i gamleskulen på Norheim kvar onsdag føremiddag. Då HF vitja arrangementet onsdag 8. februar, hadde 13 personar trassa såpeglatte fortau og funne vegen til skulen.

Ekteparet Sverre Mælen og Tove Saxvig Mælen har teke på seg ansvaret for Snakkatrimmen. Det har dei hatt sidan tiltaket vart starta i fjor vår. Ekteparet er nøye med å presisera at dei ikkje har ansvaret åleine. Det deler dei med Brita Træbakken og Bjørg Døssland.

– Det hjelper

– Snakkatrimmen handlar om at me skal trimma, men i ein litt mindre skala enn det du til dømes finn på treningssenter, seier han.

– Opplegget er likt det ein finn mange andre stader, der deltakarane har ein stol dei kan støtta seg på dersom dei treng det, seier ho.

Aldersspennet på deltakarane er frå 75 til 90 år.

– Øvingane er laga av ein fysioterapeut og er tilpassa til denne aldersgruppa. Ein trenar styrke og balanse. Økta varer i om lag ein halv time. Mange har vore med på kvar einaste trim. Dei fortel at dei merkar ein skilnad. Fleire har sagt at dei ikkje klarte å reisa seg utan å støtta seg då dei byrja. Det klarer dei no, seier ho.

Snakkatrimmen vert avrunda med litt hyggje.

– Då kokar me kaffi og serverer eit eller anna, og så sit me her og pratar.

Innflytta pensjonistar

Dei to ansvarlege er fødde og oppvaksne i Bergen. Til Kvam flytta dei for ti år sidan. Dei kjende godt til Kvam før dei vart innbyggjarar der.

– Me har hatt hytte i Herand i mange år. Og då eg var ung, hadde familien hytte på Kvamskogen. Me har alltid likt Kvam og tenkte me kunne flytta til Kvam då me vart pensjonistar. Me har ikkje angra, seier ho.

Dei to har delteke på ulike frivillige aktivitetar etter at dei flytta til Kvam. Dei siste åra har dei engasjert seg meir og meir i aktivitetar gjennom Grannehjelpa.

– Når ein flyttar til ein ny stad, er det greitt å involvera seg i det som skjer for å skaffa seg litt kontaktar. Om ein berre sit heime og ventar på at folk skal banka på døra, er det ikkje sikkert at noko skjer. Interessene våre passar godt med dei aktivitetane som er i Kvam, seier han.

– Me har alltid vore opptekne av å trimma, så då passar Snakkatrimmen for oss, seier ho.