Samlast om ny stifting
Sparebankstiftinga Hardanger har teke initiativ til ei ny stifting og 100 millionar kroner til næringslivet i Hardanger og Voss.
Det skriv Kjetil Raaen Widding, dagleg leiar i Sparebankstiftinga Hardanger i eit presseskriv.
Investeringsstiftinga Hardanger Voss er ei ny stifting som skal bidra til næringsutvikling i Ulvik, Eidfjord, Kvam, Ullensvang og Voss. Målet er nyskaping og vekst gjennom investeringar i såkornfond og andre investeringsinitiativ i regionen, skriv Widding.
Både sparebankstiftinga, herad og kommunar i regionen er med på laget, og har samla inn til saman 100 millionar kroner i gåve til stiftinga. Kvam heradsstyre vedtok i mars å gje ei gåve på 5,4 millionar kroner til stiftinga. Gåva vert finansiert med pengar frå kraftfondet.
Ullensvang kommunestyre vedtok å løyva 6,7 millionar kroner til stiftinga, finansiert med bufferfond.
Bakgrunnen for etableringa er at Hardanger og Voss har ein relativt låg del unge vekstverksemder samanlikna med Vestlandet elles, står det i skipingsinvitasjonen frå sparebankstiftinga. Næringsstrukturen er ifylgje invitasjonen prega av bransjar med tradisjonsrike verksemder og låg nyskaping.
Torsdag 27. juni samlast dei involverte partane til skipingsmøte på Voss. Også lokalpressa i regionen er invitert. Styreleiar i den nye stiftinga er Per Berge.
