Samlast i nytt fellesskap

Samarbeidet vil omfatta om lag 30.000 verksemder og 750.000 tilsette. Det opplyser Næringsforeningene i Norge (NN) i ei pressemelding.

Hans Jørgen Andersen, dagleg leiar i Kvam Næringsråd, er positiv til å samlast, og meiner at nettverksbygging og utveksling av idear og erfaringar vil gagna næringsrådet og medlemsverksemdene.

– For oss er det særs nyttig med samlingar for å knyta kontaktar og læra av kvarandre, seier Andersen.

Det vil vera ein styrke for Kvam Næringsråd, som består av éi deltidsstilling, å få meir innsikt i korleis andre jobbar med ulike tema. Det igjen vil vonleg koma dei lokale medlemsverksemdene til gode, seier den daglege leiaren.

Organisasjonen planlegg å fokusera på fleire nøkkelområde, inkludert samferdsel, rammevilkår for norsk eigarskap, straumprisar, skattar og avgifter, og innleige av arbeidskraft, for å nemna noko.

Monica Mæland, administrerande direktør i Bergen Næringsråd, meiner at samarbeidet gjev viktig samarbeid og tyngde. Næringsråda og -foreiningane er tettare på verksemdene enn andre, hevdar ho. Med dette samarbeidet kan ein formidla utfordringar og behov i næringslivet på ein tydelegare måte, meiner Mæland.

NN vil vera partipolitisk uavhengig, og har eit interimsstyre med representantar frå Bergen, Trondheim, Stavanger og Kristiansand.