Samlar tølene etter gamle kommunar

Arkiva etter Jondal kommune, Odda kommune og Ullensvang herad skal deponerast. I den samanhengen var Interkommunalt arkiv i Hordaland IKS (IKAH) på visitt i januar for å kartleggja dei tre arkiva.

Ifylgje eit notat frå rådgjevar Janny Sjåholm i IKAH vert rekkjefylgja Odda, Ullensvang og Jondal, og arbeidet tek til i veke 8. I Jondal er det meste samla i eit lite arkivlokale nær Blåhuset. Resten står i Blåhuset. Truleg vil alt verta henta på éin tur, sidan det er snakk om eit lite arkiv. Saksarkivet etter formannskapet og sentralarkivet utgjer i alt 31 hyllemeter.

Attåt dei kommunale arkivet står om lag 15 hyllemeter med privat arkiv i Jondal. Desse vert ikkje prioriterte av IKAH i fyrste omgang om ikkje det vert plass i bilen.