Samlar inn til Beitostølen-senter

Det kjem fram i ei pressemelding frå dei lokale Lions-presidentane Olav Tombre og Turid Bang. Hovudinnsamlinga i Lions Røde Fjær-aksjonen går føre seg fram til 19. mars, medan ei bøsseinnsamling skjer 11.— 13. februar.

I skrivande stund er 10,8 millionar kroner av målet på 50 millionar kroner samla inn, ifylgje lrf.no.

Dei to Kvam-klubbane skal kvar gje 50.000 kroner til ein klatrevegg i Beitostølen Helsesportsenter i Øystre Slidre kommune. Pengane kjem mellom anna frå salet av telefonkatalogar og Kvammakalenderen.

Kompetansesenteret på Beitostølen vil gje eit nytt og betre tilbod til born og unge med funksjonsnedsetjingar. Slik kan moglegheitene deira til å utvikla eige potensial og leva eit aktivt liv auka. Senteret tilbyr mellom anna symjing, padling, skyting, sykling og golf, ifylgje bhss.no.

Om lag 25 kvemmingar har vore på Beitostølen dei siste åra, ifylgje pressemeldinga. Tom Lauritz Haaland frå Ålvik er ein av dei. Han har hatt tre rehabiliteringsopphald og skal snart reisa igjen.

Haaland har hatt stort utbyte av opphalda, fortel han i pressemeldinga. På Beitostølen får ein opptrening i flotte tilhøve med profesjonelle fagfolk. Ålvikaren han fått utfalda seg ute med spesialsykkel og sit-ski.

Under opphalda på helsesportsenteret kan ein finna vener som er i nesten same situasjon. Born får utfordringar dei ikkje får heime. Funksjonshemma får høyra at dei kan trena seg opp til å fungera og fylla livet med arbeid, kultur, idrett og friluftsliv.

— Senteret har vore ein suksess. Alle har rett til å leva eit aktivt og sosialt liv, også ute, heiter det i pressemeldinga.

Ordførar i Kvam, Torgeir Næss, skriv i eit straumbrev til HF at det er ein god ting at Lions engasjerer seg for helseprosjekt som kjem mange til gode.

– Eg er overtydd om at dette er eit godt tiltak. Eg er orientert om prosjektet, har fått fyrstehands informasjon frå ein brukar av institusjonen som har opplevd stor nytte av opphald der, og oppmodar folk til å støtta årets Røde Fjær-aksjon, skriv Næss.

Beitostølen vart opna i 1970, med grunnleggjar Erling Stordahl i spissen og takka vere den aller fyrste Røde Fjær-aksjonen. Drifta vert finansiert av statlege helseføretak.