Samlar inn gåver i Kvam

Det er målet med Raudekrossen sitt julegåveprosjekt i Kvam, som starta i fjor med stor suksess.

– Målet er at alle skal få ei god jul og at det ikkje skal vera så stor forskjell, seier Alida Fonneland, som er leiar for prosjektet.

Julegåveaksjonen er inspirert av Raudekrossen i Sandefjord. Alida såg eit innlegg om aksjonen.

Målet med å starta prosjektet var at alle born skal få det dei ynskjer seg til jul. Familiar med dårleg råd nyttar seg av dette tilbodet ved å senda inn ein søknad. Dei skriv inn informasjon som ynskelister, klesstørrelsar og namn. Donasjonar vert leverte i dunkar som står på Tunet i Øystese og på Straumen i Norheimsund.

Fristen for å levera er 16. desember, opplyser Fonneland. Deretter vert donasjonane sorterte, pakka inn og delte ut.

Det går mest i leiker og klede til ungane, men det kan vera kva som helst som blir skrive på ynskelista. Vel fem personar jobbar med dette i Kvam, og dei gjer alt dei kan for at ynska til borna blir oppfylte. Dersom det dei ynskjer seg, ikkje kjem inn i innsamlinga, kjøper dei andre plassar.

Både Alida og Raudekrossen-kollega Kjersti Neteland har vorte positivt overraska over gjevargleda i Kvam. Dei får inn gåver av så god kvalitet at dei gjerne kunne ha kjøpt det til sine eigne ungar.

Trass god marknadsføring synest damene at få nyttar tilbodet. Dei har vore i kontakt med både kommunen, Nav og vaksenopplæringa. Dei trur at folk synest at det er flautt, men dei fortel vidare at ein ikkje treng uroa seg over det. Dei gjer det så diskret som mogleg, slik at borna eller andre ikkje treng å få vita kvar gåvene kjem frå.

– Det er viktig å søkja dersom ein har behov, seier Neteland.

Journalistane er mediefagelevar på Framnes Kristne Vidaregåande Skule. Red.