Om lag tjue personar deltok på folkemøtet i ungdomshuset på Torsnes, Fritun, sundag kveld.

Samla seg om kraftinnspel

Det vart arrangert folkemøte om oppgraderinga av kraftlina frå Blåfalli til Samnanger sundag. Målet var å stå samla om krava.

Journalist
Publisert Sist oppdatert

Torsnes Ungdomslag stod for tilstellinga. Grunneigarane Jon Larsgard og Guttorm Torsnes leia møtet. Forsamlinga drøfta ei felles fråsegn frå bygda i høyringa av meldinga frå Statnett SF til Noregs vassdrags- og energidirektorat (NVE). Høyringsfristen går ut om få dagar.

Målet med møtet var å verta samde om innspelet. Det vart opna for innspel og kommentarar. Larsgard viste fram dei ulike traséalternativa, før han tok fram høyringsutkastet han hadde forfatta på vegner av innbyggjarar og grunneigarar på Belsnes og Torsnes.

Meldinga frå Statrnett

• Statnett planlegg å oppgradera kraftlina mellom Blåfalli og Samnanger frå 300 til 400 kilovolt for å betra forsyningstryggleiken.

• På strekninga mellom Mauranger og Jondal ynskjer føretaket å riva den gamle kraftlina, som går via Isdalsskardet og Daurmålsdalen, og setja opp ei ny lenger vest og mykje nærare Hardangerfjorden. Den nye lina vil gå i mykje nytta turområde med fleire stølar.

• Føretaket har sendt såkalla melding om endringane til Noregs vassdrags- og energidirektorat. Direktoratet har sendt meldinga på høyring.

• Fristen for å senda innspel er 16. januar.

Skisserte fleire alternativ

I fråsegna som vert send, vert det lagt særleg vekt på to alternativ til kraftlinetraseen frå Blåfalli til Kvamskogen.

• Byggja ny kraftline i eksisterande trasé

• Byggja ny kraftline med bruk av sjøkabel

Innspelet rommar fleire argument for å nytta eksisterande trasé. Blant anna vil ein med bruk av eksisterande trasé redusera arealkonfliktar, unngå urørte naturområde og få ein kort trasé i høgfjellet samanlikna med andre alternativ.

I fråsegna vert det påpeika at fjordkryssinga vil vera synleg frå langt større avstandar enn dagens line viser frå. Det vert presisert at ein bør ta omsyn til natur og miljø. Difor bør sjøkabel verta vurdert som alternativ.

I innspelet heiter det at Statnett bør ha fokus på gjeldande stølsområde i konsekvensutgreiingane, og at stølsområda er ein viktig ressurs for landbruket og betyr mykje for kulturminne og friluftsområde.

Den raude streken viser traseen Statnett ynskjer å nytta til ny kraftline, alternativ 1.0.

Kom med innspel

Trygve Vikane påpeika at traseen Statnett ynskjer, særleg fjordkryssinga, kan by på utfordringar. Han meiner at kryssinga kan koma i konflikt med ei potensiell bru frå Belsnes til Ljones-halvøya.

Trygve Vikane gjorde sitt for å bidra til ein opplyst debatt.

Øystein Torsnes argumenterte for bruk av eksisterande trasé. Torsnes påpeika at Statnett vil kunna spara pengar om føretaket byggjer ein ny trasé ved den gamle.

Fleire sette spørjeteikn ved påstandar frå Statnett om til dømes ising på dagens line. Samtidig er det vanskeleg å argumentera mot dei utan tilstrekkeleg dokumentasjon, påpeika Larsgard.

Ingvald Jensen ynskjer at fjordkryssinga vert flytta lenger nord enn det teikningane viser.

– Om lina vert trekt lenger mot Torsnes, vil ho verta meir dominerande enn det ho er i dag, sa Jensen.

Ingvald Jensen (i midten) håpar at forslaget hans om å flytta fjordspennet mot nord, vert realisert.

Øystein Torsnes sa at fleire husstandar på Torsnes og Belsnes vil verta påverka av luftlina over fjorden. Han meiner at det er uheldig, særleg for innbyggjarane på Øvre Belsnes.

Utsegnene til både Torsnes og Jensen vart tekne med i høyringsutkastet.

Etter møtet kunne deltakarane signera for å uttrykkja støtte til meldinga.

Øystein Torsnes (t.v.) er nøgd med det som vert skrive i fråsegna i høyringa. Til høgre sit Guttorm Torsnes.
politikk nyhende jondal
Laga med Labrador CMS