Samla inn julegåver til flyktningar
Hallgeir Berge frå Strandebarm er takksam for ei rekkje julegåver til flyktningfamiliar.
Berge er regionleiar i Kristent Interkulturelt Arbeid (KIA) Vest. Han har sytt for at 24 småbarnsfamiliar med flyktningbakgrunn i Bergen og Kvam før jul vart besøkte for å få gåver. Andre henta gåver i Norheimsund kyrkje på KIA sine faste torsdagssamlingar.
Mange flyktningar i Noreg manglar eit nettverk her i landet. Dei manglar difor til dømes nokon dei kan arva klede frå, påpeikar Berge. Han har vorte mellomledd for julegåver som vert gjevne frå barnehagar og skular til born med flyktningbakgrunn.
Norheimsund barneskule har tidlegare samla inn gåver, og dei to siste åra har Sjydnahaugen barnehage i Øystese hatt ein såkalla «omvend adventskalender». Ein tom kasse vert sett fram og fylt opp med brukte leiker og klede.
Fykse Grendalag har sidan 2009 samla inn gåver i samband med julegateopninga på Fykse. Dei fyrste fem åra vart gåvene gjevne vidare via Frelsesarmeen i Bergen, men sidan har gåver vorte gjevne vidare til flyktningar via Berge.
Born på Fykse har vorte oppmoda om å ta med klede eller leiker dei ikkje nyttar lenger, pakka dei inn og merkja dei med høveleg aldersgruppe. Om lag femti julegåver vert samla inn årleg på julegateopninga, og foreldra har gjeve positive tilbakemeldingar, då dei har sett gleda dette gjev borna.
Mange som kjem frå andre land, kjenner ikkje til våre juletradisjonar og har aldri fått ei julegåve. Det er difor ekstra godt å kunna gje ein smak av jula til born. Dei kan då koma tilbake til skular og barnehagar med ei positiv oppleving i juleferien, påpeikar Berge.
