Sameinar krefter for miljøet
Kasta trevyrke kan verta grunnlag for produksjon av designstolar. Lokale krefter står bak.
Innsamlinga, som skjer i ein eigen konteinar i det som no vert kalla Kvam miljøpark i Sandvenhagen i Norheimsund, byrja nyleg. Det opplyser kommunikasjonsrådgjevar Tina Skudal i Bir AS i ei pressemelding.
Hunar Prodan vart fyrstemann til å levera noko i konteinaren. Delar av ein gamal nattklubb og bar på hotellet i Øystese vert no til nye stolar, om ikkje barstolar, av typen «Sondre».
– Det er flott at trevyrket ikkje går til spille, seier Prodan i pressemeldinga.
Lang prosess
Bak initiativet står føretaket FjordMoods AS, ått av ekteparet Pieter og Katrine H. Van Tulder. I over ti år har dei arbeidd med møbelproduksjon basert på avfall. Duoen har fått Bir og Hardanger AKS AS med på laget. Vona er å nytta eigna treavfall til å byggja kortreiste, miljøvenlege og unike stolar fulle av historier. «Sondre», som vann ei designtevling nyleg, er det fyrste produktet som kjem ut av produksjonsmodellen Furniture 2050.
– Dette er langt meir enn ein stol. Det er resultatet av eit samarbeid om ein produksjon som er god for naturen, for lokalsamfunnet og for enkeltmenneske, seier Katrine H. Van Tulder i pressemeldinga.
– Sidan me skjer trevyrket tynt og limer det saman, kan me bruka ein stor del av trevyrket som vert kasta. Samtidig vert halvfabrikata og stolane sterke når dei vert produserte på denne måten, forklarer Pieter Van Tulder.
Ikkje alt er eigna
Kunnskap krevst for å vita kva tre som er brukande. Møblar, kledning, golv, plankar og kapp er gode greier, medan til dømes MDF-plater, trykkimpregnerte materialar, greiner og rotne plankar ikkje har noko i konteinaren å gjera, ifylgje pressemeldinga.
Oppgåva til dei tilsette på treavdelinga i vekst- og attføringsverksemda Hardanger AKS er å slissa opp treverket før det vert limt og pressa saman. Metalldetektor vert nytta for å fjerna metall, fortel avdelingsleiar Jarle Harkestad.
– Me håpar at me skal få til ein jamn produksjon av stolar, seier han.
