Samde om tilbodsstruktur
Fleire utsette fag ved Kvam vidaregåande skule ser ut til å vera berga.
Den heilskaplege planen for tilbodsstruktur i Vestland fylke vart handsama av hovudutval for opplæring og kompetanse måndag. Ap, Sp, SV, INP, KrF, V, MDG og R hadde vorte samde om eit forslag som mellom anna inneber at Kvam vidaregåande vil kunna tilby både VG2 helsefagarbeidarfag og VG2 barne- og ungdomsarbeidarfag, og VG2 industriteknologi og VG2 transport og logistikk. To «klasseressursar» vert fordelte på dei fire faga.
Også fylkesutvalet skal handsama saka, før fylkestinget gjer endeleg vedtak 1.–2. oktober.
Kvam vidaregåande skule har vore kreativ og løysingsorientert, skriv partia i ei pressemelding. Modellen vil bidra til at ein nyttar kompetanse og bygg betre, at ein møter behova i arbeidslivet og at ein bidreg til auka gjennomføring, meiner partia. Dei meiner at modellen kan vera aktuell andre plassar i fylket, for å sikra eit breitt og desentralisert opplæringstilbod.
Utvalsleiar Åsmund Berthelsen (SV) sa at det har vore ein lang prosess med eit enormt engasjement. Det vil skje endringar over tid, både når det gjeld interesse hjå elevane og i arbeidslivet, sa han. Tilboda vert lyste ut i januar, så skal det gjerast justeringar i april og mai. Fyrst når inntaket er på plass, veit ein sikkert kva tilbod som faktisk vert sette i sving, påpeika han.
Stig Atle Abrahamsen (Frp) kritiserte prosessen. Han føreslo å senda saka på ei avgrensa høyring for å gje alle lik moglegheit til å kommentera innstillinga. Forslaget vart avvist med 13 mot 2 røyster.
Elias Roko Eide (H) sa at resultatet er seigpining, og meiner at strukturen ikkje vil stå seg over tid og heller ikkje dei neste fire åra, fordi det ikkje finst finansiering.
– Om ein meiner at strukturen skal stå seg over tid, betyr det at i dag varslar fleirtalet store kutt i samferdsle og kultur, sa Eide.
– I vårt forslag ligg det ei innsparing på 101 millionar kroner, som er tilsvarande det administrasjonen føreslo, repliserte Jon Olav Økland (KrF).
