Samde om sluttoppgjer for ny institusjon
Då sluttoppgjeret etter bygginga av Strandebarm omsorg stod på agendaen, kravde Fuglafjell AS Kvam herad for pengar. Til sist vart partane samde om ei løysing.
Alt i alt var partane samde om det meste då dei skulle verta einige om sluttoppgjeret. Berre eitt punkt var omtvista. Fuglafjell meinte at heradet måtte betala for lønns- og prisjusteringar som fylgje av seinkingar i prosjektet, og kravde vel 2,3 millionar kroner utan moms i eit brev før sommaren.
I september fekk Advokatfirmaet Økland & Co DA, som tala saka for Fuglafjell, svar frå heradet. Advokatfullmektig i Kvam herad, Bente Valland Bovim, skreiv til advokatfirmaet at kravet ikkje vart akseptert.
Heradet meinte at Fuglafjell AS ikkje hadde grunnlag for å krevja pengane som fylgje av seinka bygging. Subsidiært meinte Kvam herad at pengar for seinking berre kan krevjast for ein månad, og at prisjusteringa i så fall måtte gjerast for den siste månaden av prosjektet.
Bovim skreiv at heradet la til grunn at det låg føre ein gyldig kontrakt, og at kontrakten vart inngått frivillig mellom to profesjonelle partar, begge med kompetanse til å vurdera innhaldet. Av eit punkt i kontrakten går det fram at kontraktsummen ikkje skal indeksregulerast, skreiv Bovim. Dessutan kunne Fuglafjell ha valt ikkje å signera kontrakten om føretaket meinte at dei ikkje lenger kunne stå ved tilbodet, heiter det i brevet.
Utsetjinga av prosjektet kom som fylgje av at ei anna verksemd meinte at Fuglafjell ikkje stetta kvalifikasjonskrava, og klaga heradet inn for Klagenemnda for offentlege anskaffingar (KOFA).
Kort tid etterpå skreiv Bovim til entreprenøren at heradet stadfesta ein sum på sluttoppgjeret som er sett til 376.128 kroner utan moms, og bad om faktura på beløpet.
Då HF bad om innsyn i dokumentasjon på kva som hadde gått føre seg i mellomtida, svara teknisk sjef Lars Ese Ur at skrivet frå Bovim fortel kva Kvam herad og entreprenøren vart samde om i eit møte i rådhuset.
Les også:
