Samde om bruk av bru
Aktiven Skiheis AS tillèt likevel bruk av brua over Kvennelvi på Kvamskogen.
Brua har i det siste vore sperra for løypemaskina med ei gravemaskin, etter at verksemda 1. februar kunngjorde på Facebook at eigaren ville forby all motorferdsle utan avtale med eigaren på eigedomane verksemda rår over.
Bakgrunnen for stenginga av brua var at Aktiven Skiheis er misnøgd med at rekkjefølgjekravet i kommunedelplanen frå 2011 hindrar utbygging og dermed den ynskte utviklinga av eigedomen verksemda rår over. I vinter har skiheisen vore stengd på grunn av pengemangel.
Skiløypa som går over Kvennelvi, er vist på løypekartet for Kvamskogen. Kvamskogen, men ingen avtale om bruk er inngått mellom løypeansvarleg Kvamskogen Næringslag og grunneigaren.
Etter at Kvamskogen Vel tok saka opp, har laget og Kolbjørn Steine i Aktiven Skiheis i dag vorte samde om ein avtale som inneber at brua vert mellombels opna for løypekøyring til vinterferien. Det melder Kvamskogen Vel laurdag.
Ifølgje Kvamskogen Vel inneber avtalen at vellaget skal kontakta Statsforvaltaren for å tala saka til Aktiven Skiheis.
«Kvamskogen Vel mener dette er urimelig og udemokratisk, ettersom all virksomhet vest for NAF ikke blir hindret av rekkefølgekravet. Trafikksikkerheten er etter vårt syn like problematisk fra NAF til Teigabergtunnelen som fra Tokagjelet til NAF. Når det nå er vedtatt tunnel under Kvamskogen, burde rekkefølgekravet fra Statsforvalteren opphøre», heiter det i avtalen.
Ifølgje avtalen er partane samde om å samarbeida om å utvikla eigedomen til Aktiven Skiheis med stiar, skiløyper og andre tilbod til hyttefolk. Verksemda på si side godtek og legg til rette for at heile området vert nytta til skileik og turar for alle.
