– Samanliknar me eple og pærer?

Varaordførar Frode Nygård (Frp) trekte parallellen til andre badeanlegg då løyvinga til Hardangerbadet AS (HB) vart drøfta i formannskapet 17. mars. I heradsstyremøtet tysdag ville Ottar Randa (H) vita om bada eigentleg kan samanliknast.

— Samanliknar me eple og pærer? spurde han, og etterlyste tala som ligg bak poenget til varaordføraren.

— Eg refererte berre til at bada ikkje har hatt dei same utfordringane med korona. Me har store utfordringar med drifta, og den utfordringa ser det ikkje ut til at andre har hatt. Det var det eg påpeika, sa Nygård.

Forstår ikkje parallellen

Even Øyri (Ap) sa at det vesle han har gjort av undersøkingar, tilseier at anlegga ikkje kan samanliknast heilt, fordi dei er finansierte og drivne på svært ulike måtar.

— Eg forstår ikkje kvar Frode vil ved å trekkja fram situasjonen til andre bad. Det spesielle er at me er mykje meir baserte på berre kommersielle inntekter og dermed meir utsette. Kor stort tapet er, veit me ikkje, sa Jostein Ljones (Sp).

Han seier til HF at han ikkje har studert besøkstala til anlegga, som ikkje er påverka av storleiken på dei kommunale bidraga. Ljones seier han har vore i kontakt med ordføraren i Luster for å kunna samanlikna anlegga. Han påpeikar at særleg nærleiken til hotellet truleg vil innebera at stenging slår ekstra ille ut for HB.

Randa sa i møtet tysdag at H har gjort eigne undersøkingar og funne nye tal og opplysningar, men ville ikkje fortelja Geir Madsen (SV) kva informasjon han har avdekt. Til HF seier han at han har studert rekneskapen til Osbadet for 2019 og funne ut at kommunen ytte 2,4 millionar kroner i tilskot til anlegget, pluss stønad til skulebading.

Randa er ikkje usamd i at vilkåra partane var samde om i 2017, var at Kvam herad skulle ha låge kostnader med anlegget. Han påpeikar overfor HF at ting endrar seg undervegs og at ein må vera realist. 2017-vedtaket var kanskje bygt på litt sviktande grunnlag, men baserte seg på dei opplysningane og den kunnskapen ein hadde den gongen. Han meiner HB treng nokre år på seg for å finna det rette kostnads- og publikumsnivået.

35 prosent under

Ettersom HB berre har vore i drift i eitt år, veit ingen kor mange gjester anlegget vil ha i eit normalår. Selskapet opplyste i haust Kvam herad om at det reknar med å ha 80.000 gjester i eit normalt år.

I fjor vart besøkstalet 51.639, som er om lag 35 prosent lågare enn det skisserte normalåret. Anlegget fekk om lag 850.000 kroner i koronakompensasjon frå staten og hadde eit driftsunderskot på om lag 3,5 millionar kroner.

I budsjettet som låg til grunn for vedtaket om kommunal deltaking i 2017, rekna HB med sal av 61.500 enkeltbillettar pluss 750 årskort.

Ned 11 prosent i Luster

HF har spurt dei tre nemnde badeanlegga om kva dei veit om besøk og økonomi i «koronaåret» 2020. Berre Vossabadet har så langt laga eit utkast til årsmelding som er tilgjengeleg for ålmenta.

Lustrabadet, eit kommunalt anlegg drive av eit kommunalt føretak, enda i «koronaåret» med 36.805 gjester i 2020, mot 41.562 året før. Reduksjonen i gjester var dermed på 11 prosent. Skulebading er ikkje med i talet.

Anlegget får 3,1 millionar kroner i tilskot frå kommunen, mellom anna for skulebading. Ifølgje ei førebels melding til styremøtet 1. februar viser den førebelse rekneskapen overskot, mellom anna takk vere ein svært god sommar.

— Det er ikkje endeleg, men Lustrabadet endar 2020 sterkt, heiter det i meldinga.

— Forvent ikkje pluss!

Ifylgje utkastet til årsmelding som er lagd fram for styret i Vossabadet, hadde anlegget 55.116 gjester utanom skulebading i fjor, mot 67.339 året før. Nedgangen er på 18 prosent.

Netto driftsresultat i fjor vart 3,6 millionar kroner, men det meste kan tilskrivast ei overføring på 3,5 millionar kroner til dekning av tidlegare underskot.

Dagleg leiar Geir-Ole Selland i Vossabadet KF seier 2020 var det fyrste året anlegget gjekk i pluss sidan opninga i 2017. Anlegget får 3,1 millionar kroner i årleg driftstilskot frå Voss herad. Summen dekkjer kostnaden med skulebading og symjelærar.

Anlegget fekk ein halv million kroner som sin del av koronakompensasjonen Voss herad mottok. I tillegg har anlegget fått 357.000 kroner i lønskompensasjon frå heradet av di dei tilsette vart omplasserte og sette i arbeid andre stader i organisasjonen då anlegget var stengt.

Selland seier til HF at ingen bør forventa å driva badeanlegg med overskot, og at ein er heilt avhengig av driftstilskot frå kommunane. Dessutan må ein hugsa på at anlegget skal drivast, ikkje berre byggjast, påpeikar han. Selland opplyser at Vossabadet erstatta det eine symjebassenget kommunen hadde, som var frå 1960-talet, og at opinionen på Voss var positiv til bygginga.

Stengt ein ekstra månad

Osbadet hadde størst nedgang i besøkstal av dei tre bada. Der minka talet på gjester med 35 prosent. I tillegg til stenginga om våren var anlegget stengt i ein månad i november, noko dei andre anlegga ikkje var, på grunn av nærleiken til den då smitteråka byen Bergen.

Osbadet gjekk i balanse og hadde eit mindreforbruk på 100.000 kroner i fjor, opplyser dagleg leiar Torbjørg Brattabø til HF. Ho opplyser at føretaket ikkje fekk lov til å permittera nokon og ikkje har motteke kompensasjon for koronatap.

Brattabø opplyste at anlegget reduserte straumforbruket med 750.000 kroner og elles stramma inn der det var mogeleg.