Saman om snørydding
Både Kvam herad og Vestland fylkeskommune skal brøyta kaien i Norheimsund i vinter.
Det vart partane samde om då dei møttest til synfaring og prat 10. desember. Det kjem fram i referatet frå møtet.
Møtet vart avtala etter at det ved årets fyrste snøfall var uklart kven som skulle brøyta parkeringsplassane på kaien. Området på kaien er kommunalt, medan Vestland fylkeskommune er ansvarleg for vegen der bussen køyrer.
Jarle Flotve, driftsleiar for veg og anlegg i Kvam herad, skriv i referatet at fylkeskommunen, i tillegg til å brøyta vegen, skal ta bort snø som legg seg på parkeringsplassane i samband med brøytinga. Sjølve parkeringsplassane skal heradet sjølv ta seg av.
– Me håpar dette vert ei god løysing, og at parkeringsplassane vert brøyta resten av vinteren, skriv Flotve.
Kravet til brøyting er to centimeter snø for fylkeskommunen, medan det for heradet er ti centimeter.
– Me er samde om å snakkast igjen om det vert behov for det, skriv Nils Eivind Stranden, konstituert teknisk sjef i Kvam til HF.
