Saman med Samnanger om forliksråd: – Meir spissa og kompetent
Kvemmingane og samningane får frå årsskiftet sams forliksråd for å auka talet på saker og heva kompetansen til medlemene.
Den nye ordninga vedtok heradsstyret i Kvam utan ordskifte 12. desember. Same dag var ordninga godkjend av kommunestyret i Samnanger.
Rådet skal ha fast møtestad i tingrettslokala på Mo i Steinsdalen, der forliksrådet i både Kvam og Samnanger frå før held til.
Rådet får tre faste representantar og tre varamedlemer. Den eine av dei faste skal leia rådet.
Må spørja dei
Kvam herad har tidlegare valt rådsmedlemer etter kommunevalet i september 2023. Valet, som vart gjort 20. juni, skal vera utgangspunkt for representasjonen i valperioden 2025–2028. Ordførar Torgeir Næss (Ap) fekk fullmakt av heradsstyret til å tinga om korleis kvemmingane skal vera representerte i det nye rådet.
I praksis inneber dette, ifylgje saksutgreiinga, at varaordførar Frode Nygård (Frp), som leier valnemnda, skal kontakta dei valde medlemene i Kvam forliksråd og høyra om dei vil vera med vidare.
Dei faste medlemene, som vart valde så seint som i juni, er leiar Sverre Lindøy, Sissel Aase Børve og Anne Grete Berge. Varamedlemer er Siv Ljones, Martha Bruland Hellestveit og Hans Arne Børsheim.
Inntil eit nytt råd er på plass etter tingingane, sit det gamle rådet i Kvam, opplyser Næss til HF. I Samnanger, derimot, kravde kommunestyret å godkjenna valet av medlemer i det nye rådet i årets fyrste møte. Det vert skipa til i februar.
Bakgrunnen for den nye ordninga er eit innspel frå politistasjonssjef Terje Sperrevik i Kvam, Samnanger og Tysnes lensmannsdistrikt. Han fremja ynsket om eit sams forliksråd i eit møte i politirådet.
Sidan har ordførar Næss og ordførar Karl Kollbotn (Frp) i Samnanger hatt dialog om saka. Dei vart samde om å leggja saka fram for politikarane i dei to kommunane.
Meir kompetente
Grunngjevinga for samarbeidet er at dei to gamle råda handsamar få saker.
– Dette fører til at representantane som sit i dei to råda, ikkje vert trygge og gode nok på sakshandsaming. Dersom råda vert slegne saman, vil ein positiv effekt vera at ein får auka kompetansen til representantane fordi dei vil få arbeida med fleire saker. Det vil også vera lettare for sekretariatet å fylgja opp og leggja til rette for arbeidet, skriv rådmannen i sakspapira.
I tillegg til eit meir spissa og kompetent råd vil ordninga sikra mindre bruk av pengar, meiner ho.
Domstollova opnar for samarbeidet. Kommunar som har same sekretariat for rådet og som ligg i same domssokn, kan på visse vilkår vedta å ha sams råd. Vilkåra skal vera stetta i dette tilfellet. Politiet fungerer som sekretariat.
Heradsstyret gav i tillegg samtykke til å velja såkalla møtefullmektigar saman med Samnanger. Desse skal møta på vegner av partar som ikkje sjølve kan delta i møte i rådet. Ifylgje sakspapira slit kommunane med å få tak i nok møtefullmektigar, men også dette vil ifylgje rådmannen verta enklare etter samanslåinga.
