Saman i spleiselag for å skaffa bussjåførar
Mangel på bussjåførar har råka kollektivtilbodet i Vestland. No går fylkeskommunen og busselskapa saman om å rekruttera sjåførar.
I fjor løyvde fylkestinget i Vestland pengar til å rekruttera fleire bussjåførar. Det førte til at 15 kandidatar vart valde ut. Den gongen inngjekk kollektivselskapet Skyss avtale med Tide og Vy, og dekte heile kostnaden med utdanninga.
I ei pressemelding opplyser Vestland fylkeskommune at eit nytt spleiselag mellom fylket og busselskapa skal sikra opplæring til ytterlegare 47 sjåførar som skal køyra buss i Vestland. Denne gongen har Skyss inngått avtale med Tide, Vy, Firda Billag og Modalen Eksingedalen Billag. I den nye avtalen vil Skyss og kvart busselskap bidra med kvar sin halvpart av opplæringa ved privat køyreskule. Pengane vert fordelte på selskapa etter innmelde behov.
Mangel på bussjåførar har vore ei utfordring i fleire år, og har hatt direkte konsekvensar for drifta av kollektivtrafikken. Til saman vil avtalane sikra over 60 nye bussjåførar i Vestland.
– Me er glade for å sjå at pengane strekk så langt. Me treng mange bussjåførar i fylket vårt, og det er gledeleg å sjå at ordninga om delfinansiering vil gje så mange nye sjåførar, seier fylkesordførar Jon Askeland (Sp) i pressemeldinga.
Då fjorårets utdanningssamarbeid vart annonsert, opplevde selskapa stor interesse. Ifylgje Tide Buss vart plassane rivne vekk raskt, og fleire av desse kandidatane vil truleg vera ferdig utdanna til påske.
– Me er svært nøgde med det utvida samarbeidet. Det er i alle si interesse at fleire kan reisa med kollektivtransport, og for å lukkast, treng me fleire bussjåførar. Me kan tilby ein trygg, ansvarsfull og spennande jobb med gode kollegaer, og me gler oss til å få fleire flinke sjåførar på laget, seier Jørgen Haukås, administrerande direktør i Tide Buss AS.
Tide Buss har ansvar for busstransporten i Hardanger/Voss og Sunnhordland.
Les også:
