Saknar skikkeleg rullestolheis i badeanlegg

Mange rørslehemma klagar på tilkoma til distansebassenget på Vossabadet. I Hardangerbadet er det planlagt ei løysing som liknar.

Bjarte Rasmussen er byggherreombod for Hardangerbadet og dagleg leiar for Hardangerbadet KF i byggjeperioden. Han fortel at planen er å laga ein integrert rullestolheis i terapibassenget i Hardangerbadet. Denne kan rullestolbrukarar bruka sjølve.

Om rullestolbrukarar ønskjer å bruka familiebassenget eller konkurransebassenget, vil dei vera avhengige av hjelp. Hardangerbadet skal ha det han kallar eit portabelt, manuelt heissystem som skal brukast til å fira rullestolbrukarar ned i og ut av dei to største bassenga.

Klaging på Voss

I Vossabadet vert dei med nedsett funksjonsevne hjelpte ned i terapibassenget med ein heis. Skal rørslehemma bruka distansebassenget, treng dei hjelp frå ei badevakt. E av dei som har reagert på dette, er Aud-Marit Netteland, som er leiar i lokallaget til Noregs handikapforbund på Voss.

I avisa Hordaland skriv ho at løysinga gjer bassenget meir utrygt fordi vaktene må bruka tid på andre ting enn å passa på dei som badar. Dessutan går det å måtta hjelpast ut av bassenget ut over verdigheita til dei rørslehemma. Dette er menneske som ønskjer å vera mest mogleg likestilte med andre, og som vil leva så sjølvstendig som mogleg, skriv ho. Misnøya på Voss har ført til at fleire lokalpolitikarar har teke til orde for at kommunen må investera i eit tilfredsstillande heissystem også i distansebassenget.

Tilfredsstiller krava

I Noreg skal offentlege bygg vera universelt utforma. Det finst eit nasjonalt regelverk som utbyggjarane må retta seg etter. Rasmussen fortel at Hardangerbadet vil få dører som opnar seg sjølv, anten når ein rullestol nærmar seg eller når ein trykkjer på ein knapp, og det skal vera nok plass til at ein kan manøvrera ein rullestol i bygget. Både toalett og garderobar skal verta tilrettelagde for personar med nedsett funksjonsevne.

Bygget vil også verta utforma og skilta på måtar som gjer det lett for svaksynte å finna fram, samstundes som det er planlagt tiltak som skal redusera ekko i symjehallane for å tilpassa det til folk som høyrer dårleg. Dei støydempande tiltaka er førebels under utgreiing, men Rasmussen lovar at løysinga ein fell ned på, vil stetta dei offentlege krava.

Har snakka med råd

Leiar i rådet for menneske med nedsett funksjonsevne og eldre i Kvam, Marie E. Skutlaberg, fortel at rådet hadde eit møte med teknisk sjef i Kvam, Lars Ese Ur, i vinter. På møtet kom rådet med fleire innspel til utforminga av Hardangerbadet. Sidan har ikkje rådet høyrt meir frå kommunen.

– Eg meiner det hadde vore naturleg at me fekk eit svar på om råda våre vert følgde. Om det ikkje snart dukkar opp noko, kjem me til å spørja etter det, seier Skutlaberg.

Rasmussen fortel at han har fått ei liste med innspel frå rådet. Det meste på lista kjem til å verta følgt opp. Unntaket er rådet sitt innspel om at avstanden frå garderobane til terapibassenget er for stor. Skal ein gjera noko med det, ville det kravd omfattande ombygging, fortel Rasmussen.

Skutlaberg seier at ho forstår at handikapforbundet på Voss reagerer på at rullestolbrukarar må ha hjelp med å koma ut i distansebassenget på Vossabadet.

– Rørslehemma ønskjer å vera sjølvstendige og klara seg sjølve, slik som alle andre. Eg trur mange rørslehemma godt kunne tenkja seg å bruka dei store bassenga i Hardangerbadet, men eg fryktar at mange vil vegra seg for å gjera dette dersom det vert for mykje styr å koma seg uti, seier ho.