– Sakna teleslynge i rådhuset

Det skreiv Gunnvor Rabbe i ein e-post til Kvam herad etter heradsstyremøtet i Kvam rådhus i Norheimsund 25. september. Rabbe, som har høyrselstap og er leiar i Kvam høyrselslag, skriv at det ikkje var ikkje tilgjengeleg teleslynge i salen under møtet. Det gjorde at ho ikkje fekk med seg kva som vart sagt.

Ifylgje likestillings- og diskrimineringslova har offentlege og private verksemder plikt til universell utforming av såkalla allmenne funksjonar.

– Skal sjå på det

Rådmann Anita Hesthamar skriv i eit svar til Rabbe at heradsstyresalen ikkje er eigna for tradisjonell teleslynge. Det vart kjent då salen vart pussa opp for om lag ti år sidan. I staden vart det investert i mobile halsslynger. Dei skal vera tilgjengelege framme i salen, skriv ho.

– Me ser at dette er både lite kjent og lite tilgjengeleg for tilhøyrar som kjem til og går undervegs i opne møte. Me vil difor sjå på korleis me kan informera meir om dette og gjera dei meir tilgjengelege, står det i e-posten.

Ordførar Torgeir Næss (Ap), som fekk e-posten frå Rabbe, har bedt administrasjonen om å sjå på om det er mogleg å få til ei ordning for tradisjonell, fastmontert teleslynge i delar av salen. Det er framleis uvisst om det er råd å få til, opplyser Hesthamar.

– Ikkje teleslynge, men

Heller ikkje i kommunestyresalen i Ullensvang rådhus er det montert teleslynge, men det er tilrettelagt for høyrselshemma, opplyser kommunesekretær Ragnvald Joakimsen.

Ved kvar inngang er det montert eit system som oppdagar at det kjem inn personar med høyreapparat. Lyd frå lydanlegget i salen vil då verta overført til høyreapparata deira, skriv han til HF.

Mikrofonar er fastmonterte for møteleiar, nestleiar og på talarstolen. I tillegg er det montert mikrofonar i taket som tek opp lyd frå salen, og berbare mikrofonar er tilgjengelege om dei skulle verta naudsynte.

– Eg veit ikkje heilt om dette kjem inn under definisjonen «teleslynge», men det skal vera eit godt system, skriv han.

Dei som nyttar eldre høyreapparat som ikkje stettar systemet, kan nytta ei berbar teleslynge som vert lånt ut, ifylgje Joakimsen.

– Må fungera og merkjast

Det er ikkje berre for hennar eigen del Rabbe tek opp manglande tilrettelegging. Dette gjeld mange, seier ho. At det ikkje er teleslynge, men anna utstyr som er installert, betyr ikkje noko. Men det må brukast.

– Det viktigaste er at det fungerer, er godt merkt og slått på, seier Rabbe til HF.

Ei kartlegging Hørselshemmedes Landsforbund gjorde i fjor haust, syner at 70,8 prosent av kommunane i Noreg har teleslynger i kommunestyresalen. 250 av 373 kommunar svara på undersøkinga.

Ifylgje Diskrimineringsnemnda skal det ikkje vera naudsynt for brukarar av høyreapparat å sjekka før eit besøk om eit offentleg bygg i kommunen har teleslynge. Det er ei sjølvfylgje at det skal finnast teleslynge, at ho fungerer, at ho er godt merkt, at ho vert testa jamleg og at utstyret vert halde ved like, meiner nemnda.