Såg på utvidingsplanar i felten

Som HF skreiv tidlegare i vår, fremja Statsforvaltaren motsegn då framlegget til reguleringsplan var på høyring i vinter. Det inneber at kommunen ikkje utan vidare kan vedta planen.

Neste steg er dimed såkalla mekling mellom kommunen og Statsforvaltaren. Kommuneleiinga håpar å få til ei sjeldsynt hending i form av ei synfaring der sistnemnde deltek.

Inntil vidare må lokalpolitikarane og -byråkratane nøya seg med kvarandre som selskap på synfaringane. Slik var det også då utval for samfunn, plan og næring 24. april gjesta området og fekk treffa tiltakshavar Conrad Hansen i Acos Invest AS.

Så mykje nytt i saka var ikkje å melda, men Hansen fekk sjansen til å fortelja om bakgrunnen for at han i 2019 reiste hotellet. No ynskjer han altså å utvida det både med fleire rom og eit hus for konferansar og kultur på framsida av Akkjerhaugen.

Dette er problema

Sakshandsamar Håvard Apold i Ullensvang kommune orienterte dei folkevalde om nokre av dei største utfordringane i møtet med dei overordna styresmaktene. Tre av dei ni innspela rommar motsegner. Dei kjem frå Noregs vassdrags- og energidirektorat og fylkeskommunen i tillegg til Statsforvaltaren.

I tillegg til otte for skred av ymse slag – mellom anna snøskred – gjeld innvendingane særleg omfanget og verknadene av den planlagde kaien og nærleiken mellom den nye hotelldelen og kulturminnet på Akkjerhaugen. Statsforvaltaren er dessutan tydeleg motstandar av hotellrom i det nye bygget.

På Akkjerhaugen finst ei vikinggrav som er plyndra for lengst. Denne uroar fylkeskommunen seg over.

– Dei har vore her og grave med teskei mange gonger, og finn ikkje noko. Fylkeskommunen meiner ein tursti vil øydeleggja litt av den opphavlege utsjånaden. Me kan tenkja oss å setja opp noko som reklamerer litt for denne grava, så folk får vita om henne, sa Conrad Hansen til medlemene i utvalet.

Håpar på vitjing

Kommunalsjef for kultur, næring og samfunn, Kristian Bondhus-Jensen, konstaterte at ynsket er å realisera prosjektet. Neste steg er dialog med styresmaktene som har protestert. Ordføraren har vore i dialog med Statsforvaltaren om eit møtetidspunkt. Vona er å få byråkratane til Jondal på synfaring.

– Dette er ein plan som gjev mogelegheiter for å opna området meir for ålmenta og auka kvalitetane. Eg vonar me kan ha ein dialog og koma til ein konklusjon der motsegna vert trekt, sa Bondhus-Jensen.

Saka var ikkje til handsaming i møtet, men litt politisk diskusjon vart det likevel rom for undervegs på synfaringa. Elin Eide Brattabø (H) nytta høvet til å argumentera for utbygga då utvalet var samla ved foten av bautaen på haugen.

– Utbyggjaren skal ha skryt for at han gjer det for alle. Det er ikkje for eiga vinning, men for dei som bur og ferdast her. Det er utruleg flotte planar, og eg er glad for at administrasjonen og ordførar spelar på lag mot motsegnene, sa jondølingen.

Ho understreka at det knapt finst lokal motstand mot utbygginga. Varaordførar Inger Synnøve Vestrheim (H) påpeika at tiltaka vil gje utvikling.

– Og det er jo det me vil ha, sa ho.