Såg bil i fritt fall

Lærarane og elevane i valfaget «trafikk» arrangerte temadagen. Gjennom året har elevane gjennomført trafikalt grunnkurs og lært mykje om bil og trafikk. Sanne Mo tykkjer det har vore innhaldsrikt og kjekt.

– Me har ikkje berre sete inne og jobba, men også gjort praktiske ting, seier ho.

Elevane i trafikkvalfaget har vore med på å planleggja temadagen. Dei har hatt ulike oppgåver på førehand og jobba for å laga ein bra dag. Mo tykkjer det er stas å visa fram resultatet for resten av trinnet.

– Det er kjekt med ein slik dag! Dette er høgdepunktet i faget, fortel ho.

På programmet stod mellom anna ein bilkrasj. Bilen vart heist 20 meter opp i lufta og sleppt ned på bakken. Fleire av elevane vart overraska over kor kort tid fallet tok.

– Det gjekk mykje raskare enn eg trudde. Og så hadde eg sett for meg at bilen skulle verta meir øydelagd, seier Mo.

Sjå video frå bilfallet her:

Ny tradisjon

Jan Tore Alvsaker er lærar i trafikkfaget, saman med Arild Solheim. Dette er det andre året Kvam ungdomsskule tilbyr valfaget. Ifølgje Alvsaker er det populært.

– Motivasjonen til mange er å ta trafikalt grunnkurs, seier han.

Kurset er fordelt over heile skuleåret, noko som gjev mykje tid til å læra om trafikk. Dette er fyrste gongen faget arrangerer temadag. Læraren vonar at det vert tradisjon.

– Me ynskjer å gje elevane meir opplæring i og kjennskap til trafikktryggleik, fortel han.

Fleire aktørar stilte opp for å bidra med undervisning og demonstrasjonar tysdag. I løpet av temadagen skulle klassane innom ulike postar og læra meir om både fyrstehjelp og bil. Alvsaker har inntrykk av at elevane har gledd seg.

– Dei lurte litt på kva som kom. Racerbilen var ei overrasking, fortel han.

Sunt bilforhold

Bilen det er snakk om, kom frå Åsane saman med sjåfør Morten Lyngøy. Han har satsa på motorsport sidan 2021. Saman med drifteteamet sitt deltek han på konkurransar, show og andre sosiale tilstellingar. I tillegg reiser Lyngøy rundt og held føredrag for born og unge. Han tek opp tema som mobbing, psykisk helse og trafikktryggleik.

– Det er viktig å ha eit sunt forhold til bil. Bilkulturen i Noreg er stor, og då er det viktig å tenkja på tryggleik, seier Lyngøy.

Niandeklassingane fekk testa korleis det er å sitja i driftebilen. Sanne Mo tykte han var svært annleis enn ein vanleg bil.

– Her er det mange knappar og mykje utstyr. Eg hadde ikkje greidd å køyra han, seier Mo.