Så var dagen komen
Butikksjef Lene Tørvik hadde sin siste arbeidsdag hjå Coop Marked i Tørvikbygd laurdag. No er butikken historie.
Tørvik ynskte ikkje å uttala seg til avisa då HF var innom laurdag. Men ho kunne slå fast at det var ein jamn straum av kundar på den aller siste – og for ein del kanskje litt vedkjømelege – dagen.
Mange av gjestene handla mykje, kunne HF konstatera. Fredag vart det nemleg kunngjort halv pris på det aller meste av varer i butikken, noko som førte til at ein heil del tok turen innom. I lunsjtid laurdag byrja det verta rimeleg ribba i mange av hyllene og i frysarane.
150 år
Ifylgje boka «Forbrukarsamvirket i Kvam 1874–2000» av Oddvar Soldal har det vore handelsdrift i Tørvikbygd sidan midten av 1870-talet. Butikken har vore nedleggingstruga før, men bygda har lukkast med å berga vidare drift. Inntil no, altså.
Minkande omsetning og ti år med underskot låg bak valet om å leggja ned butikken. Avgjerda vart offentleg i mai. Administrerande direktør i Coop Hordaland, Lise Skarpås, sa til HF at det var ei tung avgjerd. Ho forsikra om at dei fem tilsette ville få tilbod om arbeid andre stader.
Oddbjørn Måge, som saman med Per Ørjan Skogesal Ditmarsen eig bygget gjennom Hard-Tech Eiendom AS, har ikkje så mykje konkret å dela om framtida til butikklokalet. Han opplyser i ein sms til HF at det er ting på gang, men at det er for tidleg å seia meir om saka.
Framleis i prosess
I mai vart det kjent at også butikken i Ålvik kunne verta lagd ned ved nyttår. Der går det framleis føre seg ein rekrutteringsprosess. Lise Skarpås opplyser til HF at Norsk Butikkdrift tek opp att prosessen etter nyttår.
– Me driv butikken til me har ei avklaring, og samordnar oss med Norsk Butikkdrift i så måte, skriv ho.
– Kor mange er Norsk Butikkdrift i dialog med, og kvar er dei i prosessen?
– Norsk Butikkdrift går ikkje ut med spesifikke detaljar om rekrutteringsprosessen, svarar Skarpås.
HF fekk heller ikkje svar på kor lenge Coop ser føre seg å halda liv i butikken. Skarpås skriv at Coop vil driva butikken i ein overgangsfase til ny drivar er rekruttert og tek over. Om det vert vanskeleg å finna ein ny drivar, vil Coop avgjera når butikken verta avvikla.
