Sa seg ugild i sak om båthamna
Rådmann Anita Hesthamar handsama ikkje søknaden om stønad frå kraftfondet til Tørvikbygd Båtlag.
I staden handsama ordførar Torgeir Næss (Ap) saka, som vart avgjord av heradsstyret 8. november.
Årsaka, opplyser Hesthamar til HF, er at det kunne sjå ut til at tiltaket kunne vera til gagn for dei som har båtfesterett i Skutevik. Hesthamar har personleg tilknyting til nokre av desse. Ettersom det passa for ordføraren å handsama saka, bruka ho ikkje meir tid på å granska om ho var ugild.
Tidlegare har to advokatføretak vurdert tilhøvet mellom rådmannen og leiaren i båtlaget i ei sak som galdt pålegg om fjerning av båten til Geir Øystein Djupevåg. Konklusjonen var at ho ikkje var ugild i saka. Då båtlaget i vår bad heradet oreigna areal i Skutevik, sa ho seg derimot ugild som fylgje av tilknytinga til partar i saka.
Heradsstyret avviste søknaden om ein halv million kroner i stønad til eit prosjekt med ein samla kostnad på 615.000 kroner. Båtlaget vil bruka pengane til å utvikla hamne- og friluftsområdet for å sikra fleire båteigarar gode løysingar.
Heradsstyret er samd med ordføraren i at det må liggja føre avtalar som sikrar rettane i området før det vert løyvt pengar. Elles risikerer ein at saka stoppar opp og pengane aldri utbetala, påpeika Næss i heradsstyremøtet.
Båtlaget har anka ein dom i tingretten som pålegg laget å flytta og redusera hamneanlegget, etter at fleire grunneigarar i Skutevik saksøkte laget.
