Så samlast dei på Lofthus
Ein ny møteplass for reiselivsaktørar har oppstått.
Den nye reiselivskonferansen Hardanger Next gjekk av stabelen på Hotel Ullensvang på Lofthus torsdag 25. april. 80 deltakarar var med, fortel dagleg leiar Andreas Skogseth i arrangør Visit Hardangerfjord AS:
For det meste var dei representantar for næringsdrivande i reiselivet i Hardanger, men også aktørar frå Voss og nokre andre kommunar tok turen til fruktsmørauga ved Sørfjorden.
Visit Hardangerfjord har hatt ein fast bolk med reiselivsprogram på Hardangerkonferansen, men det har ikkje vore nok til å trekkja mange frå reiselivsnæringa.
– Me har falle litt mellom to stolar, seier Skogseth.
Programmet rommar både samlingar for alle og såkalla parallellsesjonar. Både meir langsiktige, overordna perspektiv som berekraft og ansvarleg marknadsføring og meir jordnære, handfaste emne som design og korleis ein kan verta meir synleg på nettet stod på agendaen i år. Arrangementet skal jamt over dreia kring tema som framtid, kommersialisering, berekraft og utvikling.
– Me skal evaluera arrangementet, men det er kome for å bli. Me har fått mange gode tilbakemeldingar, men det er alltid nokre ting som treffer betre enn andre, seier Skogseth.
Han påpeikar at det er stor variasjon både i storleik og roller internt i reiselivet, og at det difor er utfordrande å finna innhald som treffer alle. Målet er uansett eit endå meir interessant arrangement i 2025.
Hardangerkonferansen er avlyst i 2024, utan at det hadde noko med opprettinga av den nye konferansen å gjera. Planlegginga var i gang før avlysinga, fortel direktøren.
