Så mykje kostar ferjesvikt

Det opplyser fylkesordførar Jon Askeland (Sp) i ei tilbakemelding på ymse spørsmål om ferjedrifta frå Kåre Martin Kleppe (H). Kleppe ville mellom anna vita om straffa er så moderat at operatørane «heller tar ei bot enn å anstrenge seg for å oppretthalde rutene».

Askeland opplyser at ein innstilt avgang vanlegvis fører til trekk for både tur og retur. I praksis er straffa per innstilling difor mellom 12.000 og 38.000 kroner.

– Fylkesordføraren kjenner seg difor trygg på at desse sanksjonane har ein høgare pris enn det har for reiarlaga å løysa bemanningsproblema, skriv Askeland.

– Tek det på alvor

Kleppe ville vita om røynslene med Fjord1 AS si ferjedrift det siste året gjev grunnlag for å halda dei borte frå kampen om nye ferjekontraktar i Vestland, sidan selskapet openbert «ikkje lenger er skikka til å drifta ferjer».

– Fylkesordføraren tek på alvor at representanten uttrykkjer manglande tillit til vår største operatør i ferjemarknaden. Fylkesordføraren vil gjera sitt ytste for at den naudsynte tilliten kan bli gjenoppretta, skriv Askeland.

Som HF har skrive før, er bemanningsvanskar hovudårsaka til at ein del ferjeavgangar har vorte innstilte i år. I tillegg kjem ein del tekniske problem. For at fylkeskommunen skal kunna heva ein kontrakt med eit reiarlag, må operatøren vesentleg misleghalda pliktene og ikkje retta opp i det innan rimeleg tid.

Døme på vesentleg misleghald er at trekket for manglande regularitet er over seks prosent av årleg kontraktskostnad, eller at summen av trekk i vederlag overstig ti prosent i året.

Idrett før avgang

Som HF skreiv i august, prioriterte Fjord1 å hjelpa idrettstevlinga Norseman Extreme Triathlon i Eidfjord med starten før fleire avgangen med ferja mellom Jondal og Tørvikbygd om morgonen. Fjord1 har teke sjølvkritikk for prioriteringa.

Ifylgje pressekontakt Vetle Nordgård Mikkelsen låg ein kombinasjon av fleire faktorar bak innstillingane. Gebyret vart kring 7.000 kroner per innstilte avgang.

Som HF skreiv tidlegare, var den såkalla regularitet på sambandet Jondal–Tørvikbygd i andre kvartal i år 99,48 prosent. Om ein dreg frå innstillingar som fylgje av vêrtilhøve og andre omstende som reiarlaget ikkje kan lastast for, er talet 99,57 prosent. Samla i Vestland var regulariteten 99,63 prosent i kvartalet når ein dreg frå dei nemnde omstenda.